កុងតឺន័រដឹកជញ្ជូនទំនិញរាប់សិបគ្រឿង បានធ្លាក់ពីនាវាដ៏ធំដែលចតនៅកំពង់ផែសំខាន់មួយ នៅរដ្ឋCalifornia សហរដ្ឋអាមេរិក កាលពីថ្ងៃអង្គារ (ទី៩ ខែកញ្ញា) ជាហេតុការណ៍ដែលនាំឲ្យមានការបញ្ឈប់ប្រតិបត្តិការ ខណៈដែលក្រុមនាវិក បានប្រញាប់ប្រញាល់ទប់ស្កាត់ការខូចខាត។

រូបភាពវីដេអូបានបង្ហាញឲ្យឃើញពីកុងតឺន័រដួលរំលំដូចគ្រាប់ដូមីណូ ពីនាវាដ៏ធំ នៅឯកំពង់ផែ Long Beach ជិតទីក្រុង Los Angeles។ គេឃើញកុងតឺន័រគរគ្នាយ៉ាងច្រើនទំនងជាបានពាក់ព័ន្ធនឹងឧបទ្ទវហេតុនេះ ពីកន្លែងផ្សេងៗនៃនាវាដែលត្រូវបានចុះឈ្មោះដោយប្រទេសព័រទុយហ្គាល់ឈ្មោះ Mississippi (មីស៊ីស៊ីពី)។

ភ្លាមៗនោះ គេនៅមិនទាន់ដឹងច្បាស់ថា តើមានអ្វីនៅខាងក្នុងកុងទីន័រនោះទេ ប៉ុន្តែអ្នកសារព័ត៌មានដែលហោះពីលើកន្លែងកើតហេតុ បានរាយការណ៍ថា បានឃើញស្បែកជើង និងសម្លៀកបំពាក់អណ្តែតលើផ្ទៃទឹក។

ឆ្មាំល្បាតឆ្នេរអាមេរិកបានឲ្យដឹងថា យ៉ាងហោចណាស់កុងតឺន័រចំនួន ៦៧គ្រឿង បានធ្លាក់ចូលទៅក្នុងទឹកនៅម៉ោងប្រហែល ៩ព្រឹក ម៉ោងក្នុងស្រុក ប៉ុន្តែមិនមាននរណាម្នាក់រងរបួសនៅក្នុងឧបទ្ទវហេតុនោះឡើយ។ អ្នកនាំពាក្យកំពង់ផែ លោក Art Marroquin បាននិយាយថា «ប្រតិបត្តិការដឹកទំនិញត្រូវបានផ្អាកជាបណ្តោះអាសន្ន នៅចំណតនេះ ខណៈដែលអ្នកឆ្លើយតបធ្វើការ ដើម្បីការពារកុងតឺន័រ»។

តំបន់ផ្ដាច់មុខមួយ ត្រូវបានបង្កើតឡើងនៅជុំវិញនាវានោះ ដោយមានអ្នកសង្គ្រោះបន្ទាន់ពីទីភ្នាក់ងារអគ្គិភ័យ នគរបាល និងឆ្មាំល្បាតឆ្នេរចូលរួមជាមួយគ្នា។ បើយោងតាមគេហទំព័រតាមដាននាវា បានឲ្យដឹងថា នាវា Mississippi បានទៅដល់ផែ Long Beach បន្ទាប់ពីបានចេញដំណើរកាលពីថ្ងៃទី២៦ ខែសីហា ពីកំពង់ផែ Yantian ក្នុងទីក្រុង Shenzhen ប្រទេសចិន៕