នាយកប្រតិបត្តិរបស់សហភាពអឺរ៉ុប (EU) លោកស្រីបណ្ឌិត Ursula von der Leyen នឹងពន្យល់ពីអាទិភាពរបស់លោកស្រី សម្រាប់ឆ្នាំខាងមុខ នៅថ្ងៃពុធ (ទី១០ ខែកញ្ញា) នេះ បន្ទាប់ពីមាននូវរដូវក្តៅដ៏លំបាកដែលគ្របដណ្តប់ដោយកិច្ចព្រមព្រៀងពាណិជ្ជកម្មជាមួយប្រធានាធិបតីអាមេរិក លោក Donald Trump ជាអ្វីដែលទទួលរងការរិះគន់យ៉ាងខ្លាំង។

លោកស្រីបណ្ឌិត Von der Leyen ដែលជាប្រមុខគណៈកម្មការអឺរ៉ុប នឹងថ្លែងសុន្ទរកថានៅសភាអឺរ៉ុប ក្នុងទីក្រុង Strasbourg ប្រទេសបារាំង ជាមួយនឹងសុន្ទរកថារដ្ឋសហភាពរបស់លោកស្រី ដែលជាឱកាសប្រចាំឆ្នាំ ដើម្បីកំណត់របៀបវារៈនយោបាយនៃប្លុកមានសមាជិក ២៧ប្រទេស។ 

អតីតរដ្ឋមន្ត្រីការពារជាតិអាល្លឺម៉ង់រូបនេះ បានឈ្នះអាណត្តិរយៈពេល ៥ឆ្នាំជាលើកទី២ នៅឆ្នាំ២០២៤ ហើយបានសន្យាថា នឹងផ្តោតលើការពង្រឹងការការពាររបស់អឺរ៉ុប នៅចំពោះមុខការមានក្ដីបារម្ភកាន់តែខ្លាំងឡើងៗ ពាក់ព័ន្ធនឹងប្រទេសរុស្ស៊ី និងលើការជំរុញការប្រកួតប្រជែងផ្នែកសេដ្ឋកិច្ចរបស់ទ្វីបនេះ។

លោកស្រីក៏បានគាំទ្រយ៉ាងខ្លាំង ចំពោះអ៊ុយក្រែន តាមរយៈការបន្តជំនួយហិរញ្ញវត្ថុ និងការដាក់ទណ្ឌកម្មបន្ថែមទៀតរបស់សហភាពអឺរ៉ុបលើក្រុងមូស្គូ។ ប៉ុន្តែលោកស្រីត្រូវប្រឈមជាមួយការរិះគន់យ៉ាងខ្លាំង ជុំវិញកិច្ចព្រមព្រៀងពាណិជ្ជកម្មដែលលោកស្រីបានយល់ព្រមជាមួយលោក Trump នៅរមណីយដ្ឋានកីឡាវាយកូនហ្គោល Turnberry នៅស្កុតឡែនរបស់មេដឹកនាំអាមេរិក កាលពីខែកក្កដា។

នៅក្រោមកិច្ចព្រមព្រៀងនោះ EU បានយល់ព្រមដកពន្ធលើទំនិញឧស្សាហកម្មរបស់សហរដ្ឋអាមេរិក បន្ធូរបន្ថយលទ្ធភាព សម្រាប់ផលិតផលកសិកម្មរបស់សហរដ្ឋអាមេរិក និងទទួលយកអត្រាពន្ធរបស់អាមេរិក ១៥ភាគរយលើការនាំចេញភាគច្រើនរបស់ប្លុក៕