ក្រុមហ៊ុនអាកាសចរណ៍ជប៉ុន (JAL) បានសុំអភ័យទោសជាសាធារណៈ នៅថ្ងៃពុធ (ទី១០ ខែកញ្ញា) នេះ បន្ទាប់ពីអ្នកបើកយន្តហោះស្រវឹង បាននាំឲ្យមានការពន្យារពេលជើងហោះហើរចំនួន ៣វ៉ុល ដែលជំរុញឲ្យមានការព្រមានជាលើកទី២ ពីក្រសួងដឹកជញ្ជូន ក្នុងរយៈពេលមិនដល់ ១ឆ្នាំ។

ប្រធានក្រុមហ៊ុនអាកាសចរណ៍ JAL លោកស្រី Mitsuko Tottori បានធ្វើសន្និសីទសារព័ត៌មានមួយ ដើម្បីសុំអភ័យទោស ចំពោះឧប្បត្តិហេតុ កាលពីថ្ងៃទី២៨ ខែសីហា ដែលអ្នកបើកយន្តហោះម្នាក់ បានផឹកស្រាច្រើនជ្រុល នៅកោះហាវ៉ៃ សហរដ្ឋអាមេរិក ហើយមិនអាចដំណើរការជើងហោះហើររបស់ខ្លួនទៅកាន់ទីក្រុង Nagoya ប្រទេសជប៉ុន នៅថ្ងៃបន្ទាប់។

ឧបទ្ទវហេតុនេះបណ្តាលឲ្យមានការពន្យារពេលនៃការហោះហើររបស់យន្តហោះនៃក្រុមហ៊ុន JAL ចំនួន ៣គ្រឿង ក្នុងនោះមាន ១គ្រឿង ត្រូវពន្យាររហូតដល់ ១៨ម៉ោង។ ដោយឡែកនៅថ្ងៃពុធនេះ ក្រសួងដឹកជញ្ជូនបានកោះហៅប្រធានផ្នែកសុវត្ថិភាពរបស់ក្រុមហ៊ុន JAL លោក Yukio Nakagawa ដែលបានឱនក្បាលគោរព នៅចំពោះមុខអ្នកសារព័ត៌មាន ខណៈដែលរូបលោកបានទទួលយកការព្រមានជាលាយលក្ខណ៍អក្សរថ្មីពីមន្ត្រីជាន់ខ្ពស់របស់ក្រសួង។

កាលពីខែធ្នូឆ្នាមុន JAL បានហាមប្រាមការប្រើប្រាស់គ្រឿងស្រវឹងគ្រប់ប្រភេទ ក្នុងចំណោមបុគ្គលិកជើងហោះហើរ ក្នុងអំឡុងពេលស្នាក់នៅធ្វើការនាពេលយប់ បន្ទាប់ពីអាកាសយានិក ២នាក់ បានផឹកស្រាច្រើនច្រើនជ្រុល នៅមុនជើងហោះហើររបស់ពួកគេពីទីក្រុងមែលប៊ន (អូស្ត្រាលី) ទៅទីក្រុងណារីតា (ជប៉ុន)។ នោះបណ្តាលឲ្យមានការពន្យាពេល ៣ម៉ោង ខណៈដែលពួកគេព្យាយាមកុហក អំពីការប្រើប្រាស់គ្រឿងស្រវឹងរបស់ពួកគេ ហើយក្រុមហ៊ុនអាកាសចរណ៍ទទួលបានការព្រមាន។

នៅក្នុងសន្និសីទសារព័ត៌មាននាថ្ងៃពុធនេះ លោកស្រី Tottori បាននិយាយថា ក្រុមហ៊ុនរបស់លោកស្រី នឹងពង្រឹងការត្រួតពិនិត្យបន្ថែមទៀតលើការប្រើប្រាស់គ្រឿងស្រវឹង និងសុខភាពរបស់បុគ្គលិក។ លោកស្រីបានបញ្ជាក់ថា៖ «យើងមានក្ដីបារម្ភចំពោះស្ថានភាពនេះយ៉ាងខ្លាំង ដ្បិតហេតុការណ៍នេះនៅតែកើតឡើង បើទោះជាមានការដាក់ចេញនូវវិធានការកាលពីខែធ្នូឆ្នាំកន្លងទៅក៏ដោយ»៕