មេដឹកនាំប្រឆាំងអូស្ត្រាលី លោកស្រី Sussan Ley បានបណ្តេញសមាជិកព្រឹទ្ធសភាម្នាក់ចេញពីក្រសួងស្រមោលរបស់លោកស្រី នៅថ្ងៃពុធ (ទី១០ ខែកញ្ញា) នេះ ពាក់ព័ន្ធនឹងការធ្វើអត្ថាធិប្បាយ «ប៉ះពាល់យ៉ាងខ្លាំងដល់អារម្មណ៍» របស់ជនអន្តោប្រវេសន៍ឥណ្ឌា ហើយបន្ទាប់មកបដិសេធមិនគាំទ្រការដឹកនាំរបស់លោកស្រី។

លោកស្រី Jacinta Nampijinpa Price សមាជិកព្រឹទ្ធសភា សម្រាប់ដែនដីភាគខាងជើង ក្នុងក្រុមកណ្តាល-ស្ដាំនិយម គឺគណបក្សសេរីនិយម បាននិយាយយោងទៅដល់ជនអន្តោប្រវេសន៍ឥណ្ឌា ក្នុងអំឡុងពេលផ្ដល់បទសម្ភាសន៍តាមវិទ្យុកាលពីសប្តាហ៍មុន។

លោកស្រី Price ដែលបានកាន់តំណែងរដ្ឋមន្ត្រីឧស្សាហកម្មការពារជាតិ និងបុគ្គលិកការពារជាតិ នៅក្នុងគណៈរដ្ឋមន្ត្រីស្រមោល បានបដិសេធមិនសុំអភ័យទោស ចំពោះការអត្ថាធិប្បាយនេះ បើទោះបីជាមានការថ្កោលទោសពីសំណាក់នាយករដ្ឋមន្ត្រីអូស្ត្រាលី លោក Anthony Albanese សមាជិកគណបក្សផ្ទាល់របស់ខ្លួន និងសមាជិកសហគមន៍ឥណ្ឌាក៏ដោយ។ លោកស្រី Ley បាននិយាយថា លោកស្រីបានស្វែងរកការលាលែងពីតំណែងរបស់លោកស្រី Price ដោយសារតែលោកស្រី «មិនអាចបំពេញ» តាមស្តង់ដារកម្រិតខ្ពស់ដែលត្រូវបានរំពឹងទុកពីរដ្ឋមន្ត្រីស្រមោលឡើយ។

លោកស្រីបានប្រាប់សន្និសីទសារព័ត៌មាននៅថ្ងៃទី១០ ខែកញ្ញានេះថា៖ «សមាជិកព្រឹទ្ធសភា លោកស្រី Nampijinpa Price បានធ្វើអត្ថាធិប្បាយដែលធ្វើឲ្យប៉ះពាល់យ៉ាងខ្លាំងដល់អារម្មណ៍របស់ប្រជាជនអូស្ត្រាលីដើមកំណើតឥណ្ឌា។ ការអត្ថាធិប្បាយនេះ គឺមិនត្រឹមត្រូវ ហើយមិនគួរធ្វើឡើយ។ ហើយទោះបីជាត្រូវបានផ្តល់ពេលវេលា និងឱកាស ដើម្បីឲ្យមានការសុំអភ័យទោសក៏ដោយ ក៏សមាជិកព្រឹទ្ធសភា លោកស្រី Jacinta Nampijinpa Price មិនបានសុំអភ័យទោសដែរ»។

នៅក្នុងសេចក្តីថ្លែងការណ៍មួយ លោកស្រី Price បាននិយាយថា លោកស្រីបានទទួលយកការសម្រេចចិត្តរបស់លោកស្រី Ley ហើយបានសង្កត់ធ្ងន់ថា លោកស្រីមិនមានចេតនាមើលងាយសហគមន៍ឥណ្ឌានោះទេ ប៉ុន្តែគ្រាន់តែលើកឡើងពីក្ដីបារម្ភ អំពី «ទំហំនៃជនអន្តោប្រវេសន៍ប៉ុណ្ណោះ»៕