បន្ទាប់ពីការវាយប្រហារតាមអាកាសដ៏គួរឱ្យភ្ញាក់ផ្អើលរបស់អ៊ីស្រាអែល លើរដ្ឋធានីកាតា ក្នុងអ្វីដែលខ្លួននិយាយថាជាការតាមកម្ចាត់ថ្នាក់ដឹកនាំក្រុមហាម៉ាស សារព័ត៌មានរ៉យទ័រមានចេញអត្ថបទបែបវិភាគមួយនៅថ្ងៃព្រហស្បតិ៍ (១១ កញ្ញា) នេះថា ប្រតិបត្តិការយោធានេះគឺជាការសាកល្បងដ៏សំខាន់លើដែនកំណត់នៃសម្ព័ន្ធភាពដែកថែបរវាងអាមេរិក និងអ៊ីស្រាអែល។

តិចជាងបួនខែមុន លោកប្រធានាធិបតី Donald Trump បានជួបជាមួយមេដឹកនាំទីក្រុងដូហា ដោយលើកសរសើរវិមានដ៏ស្កឹមស្កៃរបស់កាតា និងចុះហត្ថលេខាលើកិច្ចព្រមព្រៀងការពារយ៉ាងទូលំទូលាយ ជាមួយរដ្ឋឈូងសមុទ្រមួយនេះ ដែលក៏ជាសម្ព័ន្ធមិត្តទីក្រុងវ៉ាស៊ីនតោនដ៏សំខាន់សម្រាប់មូលដ្ឋានទ័ពអាមេរិកដ៏ធំបំផុតនៅមជ្ឈិមបូព៌ា។

ការវាយប្រហារនៅទីក្រុងដូហានោះ បានដាក់សម្ពាធលើទំនាក់ទំនង ដោយធ្វើឱ្យលោក Trump ហាក់ខឹងសម្បារយ៉ាងខ្លាំងលើអ៊ីស្រាអែល ខណៈក៏មានការថ្កោលទោសពីកាតា និងសម្ព័ន្ធមិត្តលោកខាងលិច។ ទោះយ៉ាងនេះក្ដី ក្រុមអ្នកវិភាគមើលឃើញថា ការគាំទ្ររបស់លោក Trump ចំពោះអ៊ីស្រាអែល នៅតែមានដដែល ទោះបីជាមានការខ្វែងគំនិតគ្នាខ្លះក៏ដោយ។

ក្រុមអ្នកវិភាគ និងមន្ត្រីអាមេរិកនិយាយថា ការវាយប្រហារនេះទំនងជាមិនផ្លាស់ប្តូរវិធីសាស្រ្តមូលដ្ឋានរបស់អាមេរិក ចំពោះអ៊ីស្រាអែលទេ ប៉ុន្តែផលប៉ះពាល់តិចតួចនៅតែមាន ដោយការទម្លាក់គ្រាប់បែកនេះបានគូសបញ្ជាក់ពីជម្រៅដ៏ត្រជាក់នៅបាតក្រោមនៃទំនាក់ទំនងលោក Trump-Netanyahu ។

ចំណែកលោក Trump វិញ ម្តងម្កាលបានសម្តែងការមិនពេញចិត្តនឹងលោក Netanyahu ប៉ុន្តែរដ្ឋបាលរបស់លោកនៅតែគាំទ្រយ៉ាងខ្លាំងដល់យុទ្ធនាការរបស់អ៊ីស្រាអែល ក្នុងការធ្វើឱ្យក្រុមហាម៉ាសចុះខ្សោយ និងអនុញ្ញាតឱ្យអ៊ីស្រាអែល នាំមុខភាគច្រើនលើបញ្ហាសំខាន់ៗ ដូចជាការវាយប្រហារលើកម្មវិធីនុយក្លេអ៊ែររបស់អ៊ីរ៉ង់ជាដើម៕