នៅថ្ងៃព្រហស្បតិ៍នេះ នាយករដ្ឋមន្រ្តីប៉ូឡូញលោក Donald Tusk បានធ្វើការសង្កត់ធ្ងន់ពីសារៈសំខាន់នៃការប្តេជ្ញាចិត្តរបស់សម្ព័ន្ធមិត្ត និងការធ្វើទំនើបកម្មកងទ័ពអាកាសប៉ូឡូញ អំឡុងពេលរូបលោកបំពេញទស្សនកិច្ចទៅកាន់មូលដ្ឋានយោធា Lask ។

លោកនិយាយថា ពួកយើងនឹងធ្វើអ្វីៗគ្រប់បែបយ៉ាង ដើម្បីធានាថា ការប្តេជ្ញាចិត្តសម្ព័ន្ធមិត្តរបស់ពួកយើងដែលសំខាន់បំផុតតាមទស្សនៈរបស់ពួកយើងនៅថ្ងៃនេះ ត្រូវបានបំពេញដោយសម្ព័ន្ធមិត្តរបស់ពួកយើង ដើម្បីឲ្យពួកយើង ក្នុងនាមជាប្រទេស និងក្នុងនាមអ្នករាល់គ្នាជាអ្នកបើកបរយន្តហោះប៉ូឡូញ ពុំត្រូវបានគេទុកចោលឲ្យនៅម្នាក់ឯងនោះទេ មិនថានៅក្នុងពេលមានសន្តិភាព ឬសង្រ្គាមនោះឡើយ ។

កាលពីព្រឹកថ្ងៃពុធ ប៉ូឡូញបានបាញ់ទម្លាក់យានដ្រូនជាច្រើនគ្រឿងនៅក្នុងដែនអាកាសរបស់ខ្លួន ដោយមានការគាំទ្រពីយន្តហោះយោធាសម្ព័ន្ធមិត្តអង្គការណាតូរបស់ខ្លួន និងជាសមាជិកលើកដំបូងគេនៃសម្ព័ន្ធមិត្តយោធាលោកខាងលិច បានបាញ់ទម្លាក់យានដ្រូនបែបនេះ អំឡុងសង្រ្គាមរុស្ស៊ីនៅអ៊ុយក្រែន ។

អាកាសយានដ្ឋាន Chopin និងអាកាសយានដ្ឋាន Modlin នៅទីក្រុងវ៉ាសូវី ក៏ដូចជាអាកាសយានដ្ឋាន Rzeszow និងអាកាសយានដ្ឋាន Lublin នៅភាគខាងកើតប្រទេស បានបិទដំណើរការបណ្តោះអាសន្ន មុនពេលចាប់ផ្តើមប្រតិបត្តិការឡើងវិញ ។

គួរឲ្យដឹងថា ប្រទេសជាច្រើននៅជាប់ព្រំដែនអ៊ុយក្រែន បានរាយការណ៍ម្តងម្កាលពីមីស៊ីល ឬយានដ្រូនរុស្ស៊ី ហោះចូលដែនអាកាសរបស់ពួកគេ ចាប់តាំងពីការវាយលុកឆ្នាំ ២០២២របស់រុស្ស៊ីលើអ៊ុយក្រែន ប៉ុន្តែពុំដែលមានទ្រង់ទ្រាយធំបែបហ្នឹងនោះទេ ហើយពួកគេអត់ដឹងថាត្រូវបានទម្លាក់វានោះដែរ ៕