ភាគហ៊ុនអាស៊ីបានជួបប្រទះនឹងលំហូរចេញយ៉ាងខ្លាំងក្លានូវសាច់ប្រាក់របស់វិនិយោគិនបរទេស នៅក្នុងខែសីហា ដោយសារក្ដីបារម្ភ អំពីអត្រាពន្ធរបស់ប្រធានាធិបតីអាមេរិក លោក Donald Trump បានផ្ដល់ផលប៉ះពាល់អវិជ្ជមានដល់ទស្សនវិស័យ សម្រាប់អ្នកនាំចេញរបស់តំបន់ ខណៈពេលដែលការធ្លាក់ចុះតម្លៃប្រាក់ដុល្លារអាមេរិក បានបន្ថែមសម្ពាធលើកម្រិតចំណេញ និងកង្វល់អំពីការប្រកួតប្រជែង។

យោងតាមទិន្នន័យដែលចងក្រងដោយក្រុមហ៊ុន LSEG បានឲ្យដឹងថា វិនិយោគិនបរទេស បានលក់ភាគហ៊ុនសុទ្ធតម្លៃ ៨,៨ពាន់លានដុល្លារ នៅទូទាំងប្រទេសឥណ្ឌា កោះតៃវ៉ាន់ កូរ៉េខាងត្បូង ថៃ ឥណ្ឌូនេស៊ី វៀតណាម និងហ្វីលីពីន កាលពីខែមុន ដោយបានបញ្ចប់ពេលវេលាទិញរយៈពេល ៣ខែជាប់គ្នា។

កាលពីខែមុន លោក Trump បានដាក់អត្រាពន្ធចន្លោះពី ១០ភាគរយ ទៅ ៥០ភាគរយលើការនាំចូលទំនិញពីដៃគូពាណិជ្ជកម្មសំខាន់ៗ ក្នុងនោះរួមមានទាំង ៥០ភាគរយលើប្រទេសឥណ្ឌា ២០ភាគរយលើកោះតៃវ៉ាន់ ១៩ភាគរយលើប្រទេសថៃ និង ១៥ភាគរយលើកូរ៉េខាងត្បូងផងដែរ។

ក្រុមហ៊ុន Nomura បានឲ្យដឹងនៅក្នុងរបាយការណ៍មួយថា បើទោះបីក្រុមហ៊ុននាំចេញអាស៊ី បានឆ្លងផុតការចំណាយដោយភាគច្រើនលើពន្ធនាំចេញទៅកាន់សហរដ្ឋអាមេរិកក៏ដោយ ក៏ការថយចុះនូវប្រាក់ចំណេញ ទំនងជាមាននៅក្នុងប៉ុន្មានខែខាងមុខ ដោយសារពន្ធបដិការឡើងខ្ពស់បន្ថែមទៀត។

ភាគហ៊ុនរបស់ឥណ្ឌាបាននាំមុខគេ សម្រាប់លំហូរចេញនូវសាច់ប្រាក់ក្នុងតំបន់ ខណៈដែលវិនិយោគិនបរទេសបានលក់ភាគហ៊ុនក្នុងស្រុកដែលមានតម្លៃប្រហែល ៤ពាន់លានដុល្លារ ដែលជាចំនួនច្រើនបំផុត សម្រាប់រយៈពេលតែមួយខែ គិតចាប់តាំងពីខែមករាមក។

វិនិយោគិនបរទេសបានលក់ភាគហ៊ុននៅកោះតៃវ៉ាន់ដែលមានតម្លៃ ២,០៥ពាន់លានដុល្លារ ភាគហ៊ុននៅវៀតណាម ១,៦៣ពាន់លានដុល្លារ ភាគហ៊ុននៅកូរ៉េខាងត្បូង ១,០៦ពាន់លានដុល្លារ និងភាគហ៊ុននៅថៃ ៧០៩លានដុល្លារ កាលពីខែមុន។ តែភាគហ៊ុនឥណ្ឌូនេស៊ី បានបញ្ច្រាស់និន្នាការនេះ ដោយមាននូវទឹកប្រាក់ ៦៧៦លានដុល្លារនៃលំហូរចូលទុនបរទេសសុទ្ធ៕