សមាជិកសភាសហភាពអឺរ៉ុប (EU) កាលពីថ្ងៃព្រហស្បតិ៍ (ទី១១ ខែកញ្ញា) បានអំពាវនាវឲ្យដាក់ទណ្ឌកម្មរដ្ឋមន្ត្រីអ៊ីស្រាអែលនិយមជ្រុល ២រូប និងទប់ស្កាត់ទំនាក់ទំនងពាណិជ្ជកម្ម ពាក់ព័ន្ធនឹងសង្គ្រាមនៅតំបន់ហ្កាហ្សា ដោយគាំទ្រការជំរុញពីប្រធានគណៈកម្មការអឺរ៉ុប លោកស្រី Ursula von der Leyen។

កាលពីថ្ងៃពុធនៅក្នុងសុន្ទរកថាប្រចាំឆ្នាំដ៏សំខាន់របស់លោកស្រីទៅកាន់សភាអ៊ឺរ៉ុប ប្រមុខ EU បានលើកឡើងថា លោកស្រីនឹងស្នើនូវវិធានការទាំងនោះ ដោយទុកឲ្យតុលាការនៃប្រទេសជាសមាជិករបស់ប្លុកជាអ្នកសម្រេច។

ប៉ុន្តែវានឹងពិបាកណាស់ក្នុងការទទួលបានវិធានការនេះ ដោយសារមានការបែកបាក់យ៉ាងខ្លាំងក្លា រវាងប្រទេសសមាជិកទាំង ២៧ របស់សហភាពអឺរ៉ុប ជុំវិញសង្រ្គាមអ៊ីស្រាអែល នៅតំបន់ហ្កាហ្សា។

សភាអ៊ឺរ៉ុប បានឲ្យដឹងថា ខ្លួនបានបោះឆ្នោតលើដំណោះស្រាយមិនជាប់ចំណងផ្លូវច្បាប់ ដែល «គាំទ្រដល់ការសម្រេចចិត្តរបស់ប្រធានគណៈកម្មការ ក្នុងការផ្អាកការគាំទ្រទ្វេភាគីរបស់ EU ចំពោះអ៊ីស្រាអែល និងដើម្បីព្យួរផ្នែកខ្លះនៃកិច្ចព្រមព្រៀងសហភាពអឺរ៉ុប-អ៊ីស្រាអែល ទាក់ទងនឹងពាណិជ្ជកម្ម»។

សភាបានបន្ថែមថា ខ្លួនក៏អំពាវនាវផងដែរឲ្យមានការដាក់ទណ្ឌកម្ម លើរដ្ឋមន្ត្រីហិរញ្ញវត្ថុអ៊ីស្រាអែល លោក Bezalel Smotrich និងរដ្ឋមន្ត្រីសន្តិសុខជាតិលោក Itamar Ben Gvir។

សហភាពអឺរ៉ុបបានប្រឈមនឹងការរិះគន់កាន់តែខ្លាំងឡើង ចំពោះការខកខានមិនបានចត់វិធានការកាន់តែខ្លាំងក្លា ជុំវិញស្ថានភាព នៅតំបន់ហ្កាហ្សា៕