ប្រធានាធិបតីសហរដ្ឋអាមេរិកលោក Donald Trump បាននិយាយថា ការលុកលុយយានដ្រូនរុស្ស៊ីចូលទៅក្នុងដែនអាកាសប៉ូឡូញ អាចជាកំហុសមួយ ។

លោក Trumpបាននិយាយប្រាប់ក្រុមអ្នកសារព័ត៌មានមុនពេលឡើងជិះឧទ្ធម្ភាគចក្រ Marine One ថា លោកពុំសប្បាយចិត្តទាល់តែសោះចំពោះអ្វីត្រូវធ្វើជាមួយស្ថានភាពទាំងមូលនេះ ប៉ុន្តែគ្រាន់តែសង្ឃឹមថា រឿងនឹងបញ្ចប់ត្រឹមនេះ ។

លោកថា វាអាចជាកំហុសមួយ ។ តើវាអាចជាកំហុសឬ? ប៉ុន្តែមិនសំខាន់ថាបែបណាទេ លោកមិនសប្បាយចិត្តចំពោះអ្វីៗដែលត្រូវធ្វើជាមួយស្ថានភាពបែបនេះ ។

គួរឲ្យដឹងថា កាលពីព្រឹកថ្ងៃពុធកន្លងទៅ ប៉ូឡូញបានបាញ់ទម្លាក់យានដ្រូនជាច្រើនគ្រឿងនៅក្នុងដែនអាកាសរបស់ខ្លួន ដោយមានការគាំទ្រពីយន្តហោះយោធាសម្ព័ន្ធមិត្តអង្គការណាតូរបស់ខ្លួន និងជាសមាជិកលើកដំបូងគេនៃសម្ព័ន្ធមិត្តយោធាលោកខាងលិច បានបាញ់ទម្លាក់យានដ្រូនបែបនេះ អំឡុងសង្រ្គាមរុស្ស៊ីនៅអ៊ុយក្រែន ។

អាកាសយានដ្ឋាន Chopin និងអាកាសយានដ្ឋាន Modlin នៅទីក្រុងវ៉ាសូវី ក៏ដូចជាអាកាសយានដ្ឋាន Rzeszow និងអាកាសយានដ្ឋាន Lublin នៅភាគខាងកើតប្រទេស បានបិទដំណើរការបណ្តោះអាសន្ន មុនពេលចាប់ផ្តើមប្រតិបត្តិការឡើងវិញ ។

ប្រទេសជាច្រើននៅជាប់ព្រំដែនអ៊ុយក្រែន បានរាយការណ៍ម្តងម្កាលពីមីស៊ីល ឬយានដ្រូនរុស្ស៊ី ហោះចូលដែនអាកាសរបស់ពួកគេ ចាប់តាំងពីការវាយលុកឆ្នាំ ២០២២របស់រុស្ស៊ីលើអ៊ុយក្រែន ប៉ុន្តែពុំដែលមានទ្រង់ទ្រាយធំបែបហ្នឹងនោះទេ ហើយពួកគេអត់ដឹងថាត្រូវបានទម្លាក់វានោះដែរ ៕