ការប្រមូលផ្តុំគ្នាត្រូវបានធ្វើឡើងនៅក្នុងទីក្រុងនានាទូទាំងប្រទេសអូស្ត្រាលី នាថ្ងៃសៅរ៍ (ទី១៣ ខែកញ្ញា) នេះ ដោយមានការប៉ះទង្គិចគ្នា រវាងក្រុមអ្នកតវ៉ាជាបដិបក្ខ ចំពេលមានការប្រឈមមុខដាក់គ្នាដ៏តានតឹងជាមួយមន្ត្រីនគរបាល។

ក្រុមគាំទ្រប៉ាឡេស្ទីន សកម្មជនសិទ្ធិជនជាតិដើមភាគតិច និងក្រុមបាតុករប្រឆាំងរដ្ឋាភិបាល បាននាំគ្នាចេញទៅតាមដងផ្លូវ ក្នុងទីក្រុង Melbourne, Sydney, Brisbane, Adelaide និង Darwin។

នៅទីក្រុងមែលប៊ន ប្រព័ន្ធផ្សព្វផ្សាយក្នុងស្រុក បានរាយការណ៍ពីការប្រឈមមុខដាក់គ្នាដ៏តានតឹង រវាងក្រុមបាតុករ និងនគរបាល ខណៈដែលក្រុមបិដបក្ខបានចាប់ផ្ដើមប៉ះទង្គិច។ សារព័ត៌មាន The Age បានរាយការណ៍ថា អ្នកតវ៉ាគាំទ្រប៉ាឡេស្ទីន និងសិទ្ធិជនជាតិដើមភាគតិច បានប្រឈមមុខនឹងក្រុមប្រឆាំងរដ្ឋាភិបាល ដោយហៅពួកគេថា ពូកណាហ្ស៊ីនិយម។

ចំណែកនៅទីក្រុង Sydney នគរបាលរាប់រយនាក់ត្រូវបានដាក់ពង្រាយពាសពេញទីក្រុង។ ហើយបើយោងតាមនគរបាល បានឲ្យដឹងថា បុរសម្នាក់ត្រូវបានចាប់ខ្លួនពីបទរំលោភសន្តិភាព។

ការប្រមូលផ្តុំគ្នាទាំងនេះ កើតឡើងបន្ទាប់ពីមានសកម្មភាពស្តាំនិយមជ្រុលជាបន្តបន្ទាប់កាលពីចុងខែមុន នៅពេលដែលសមាជិកនៃបណ្តាញសង្គមនិយមជាតិ បានលេចមុខនៅក្នុងបាតុកម្មជាច្រើន ដោយស្រែកពាក្យស្លោកនានា ដូចជា «Hail White Australia» (សាទរប្រជាជនអូស្ត្រាលីស្បែកស)។

នៅទីក្រុងមែលប៊ន ក្រុមមួយបានវាយប្រហារនៅកន្លែងតវ៉ាជនជាតិដើមភាគតិច ជាសកម្មភាពដែលក្រុមអ្នករិះគន់ បានលើកឡើងថា បានគូសបញ្ជាក់ពីការជំទាស់នៃក្រុមប្រឆាំងអន្តោប្រវេសន៍ ដែលផ្តោតលើប្រជាជនដើមដំបូងរបស់ប្រទេសអូស្ត្រាលី៕