រដ្ឋមន្ត្រីការបរទេសប៉ូឡូញ លោក Radoslaw Sikorski បាននិយាយថា យានដ្រូនរបស់រុស្ស៊ី ដែលជ្រៀតចូលដែនអាកាសរបស់ប្រទេសសមាជិកអង្គការណាតូ ប៉ូឡូញ កាលពីសប្តាហ៍មុន មានគោលបំណងសាកល្បងការឆ្លើយតបរបស់សម្ព័ន្ធយោធាលោកខាងលិចមួយនេះ ដោយមិនបង្កឱ្យមានសង្រ្គាមពេញលក្ខណៈនោះទេ។

គួររម្លឹកថា យន្តហោះចម្បាំងណាតូ បានបាញ់ទម្លាក់ដ្រូនរុស្ស៊ីជាច្រើនគ្រឿង ដែលចូលដែនអាកាសប៉ូឡូញ កាលពីថ្ងៃពុធសប្ដាហ៍មុន អំឡុងការវាយប្រហារលើប្រទេសជិតខាងអ៊ុយក្រែន ដោយនេះជាលើកទីមួយហើយដែលសកម្មភាពបែបនវត្រូវធ្វើឡើងដោយសម្ព័ន្ធយោធា ចាប់តាំងពីការចាប់ផ្តើមនៃសង្រ្គាមនៅអ៊ុយក្រែនមក។ រុស្ស៊ីបដិសេធថា ខ្លួនមិនមានចេតនាកំណត់គោលដៅលើប៉ូឡូញនោះឡើយ។

ប្រមុខការទូតប៉ូឡូញ លោក Sikorski បានប្រាប់កាសែត The Guardian របស់ចក្រភពអង់គ្លេស កាលពីថ្ងៃអាទិត្យ (១៤ កញ្ញា) ថា "ដ្រូនទាំងអស់សុទ្ធតែមិនបង្កហានិភ័យខ្លាំង ដែលហាក់ដូចជាបង្ហាញថា រុស្ស៊ីព្យាយាមសាកល្បងណាតូ ជាជាងការបើកសង្រ្គាម"។ លោកក៏បានច្រានចោលការអះអាងដែលថា ប្រព័ន្ធការពាររបស់ប៉ូឡូញ មិនបានត្រៀមខ្លួនរួចរាល់ទេ បន្ទាប់ពីមានតែដ្រូនប៉ុន្មានគ្រឿងប៉ុណ្ណោះត្រូវបាញ់ទម្លាក់ ក្នុងចំណោមការបំពានផ្លូវអាកាស ១៩លើកដែលត្រូវបានរាយការណ៍។

ជាមួយគ្នានេះ អង្គការណាតូបាននិយាយកាលពីថ្ងៃសុក្រសប្ដាហ៍មុនថា ខ្លួនគ្រោងដាក់ពង្រាយយន្តហោះចម្បាំងបន្ថែមទៀតទៅកាន់ស្លាបខាងកើត ដើម្បីពង្រឹងការការពារប្រឆាំងនឹងការវាយប្រហារដោយយានដ្រូនបែបនេះនាពេលអនាគត៕