លោកនាយករដ្ឋមន្ត្រី Keir Starmer កាលពីថ្ងៃអាទិត្យ (ទី១៤ ខែកញ្ញា) បាននិយាយថា ប្រទេសអង់គ្លេសនឹងមិនបណ្ដោយឲ្យមនុស្សទទួលរងនូវអារម្មណ៍បំភិតបំភ័យ «ដោយសារតែប្រវត្តិរបស់ពួកគេ ឬសម្បុរស្បែករបស់ពួកគេ» នោះឡើយ ហើយលោកបានបញ្ជាក់ថា «នឹងមិនចុះញ៉ម ចំពោះអ្នកដែលប្រើទង់ជាតិជានិមិត្តរូបនៃអំពើហិង្សា ការភ័យខ្លាច និងការបែកបាក់គ្នាឡើយ» ដោយការលើកឡើងនេះកើតឡើងបន្ទាប់ពីការតវ៉ាដ៏ធំរបស់ក្រុមស្តាំនិយមជ្រុល ឃើញមានការប៉ះទង្គិចគ្នាជាមួយនគរបាល។ 

ជាមួយគ្នានេះ លោក Starmer ក៏បានថ្កោលទោសផងដែរ ចំពោះការវាយប្រហារទៅលើមន្រ្តីនគរបាល ខណៈដែលនេះគឺជាការអត្ថាធិប្បាយដំបូងរបស់លោក ពាក់ព័ន្ធនឹងការប្រមូលផ្តុំកាលពីថ្ងៃសៅរ៍ចុងសប្ដាហ៍កន្លងមក ដែលរៀបចំដោយសកម្មជនស្តាំនិយមជ្រុល គឺលោក Tommy Robinson និងដែលបើយោងតាមនគរបាល មានអ្នកចូលរួមរហូតដល់ ១៥០.០០០នាក់។

ការប៉ះទង្គិចគ្នានោះបានធ្វើឲ្យមន្ត្រី ២៦នាក់រងរបួស ក្នុងនោះ ៤នាក់ធ្ងន់ធ្ងរ និងឈានដល់ការចាប់ខ្លួនមនុស្ស ២៤នាក់។ នគរបាលទីក្រុងឡុងដ្រ៍ បានបញ្ជាក់ថា នឹងធ្វើការចាប់ខ្លួនបន្ថែមទៀតនៅប៉ុន្មានថ្ងៃខាងមុខនេះ។ មួយថ្ងៃបន្ទាប់ពីក្រុមអ្នកតវ៉ាបានប្រមូលផ្តុំគ្នា ក្បែរការិយាល័យវិមាន Downing Street របស់លោក លោក Starmer បានលើកឡើងនៅលើបណ្ដាញសង្គម X ថា៖ «ប្រជាជនមានសិទ្ធិតវ៉ាដោយសន្តិវិធី។ វាគឺជាស្នូលនៃតម្លៃរបស់ប្រទេសរបស់យើង»។

តែលោកបានប្រាប់ទៀតថា៖ «ប៉ុន្តែយើងនឹងមិនអត់ឱនដល់ទង្វើវាយដំលើមន្ត្រីនគរបាលដែលបំពេញការងាររបស់ពួកគេ ឬសម្រាប់មនុស្សដែលមានអារម្មណ៍ភ័យខ្លាច នៅតាមដងផ្លូវរបស់យើង ដោយសារតែប្រវត្តិ ឬសម្បុរស្បែករបស់ពួកគេនោះឡើយ»។ មេដឹកនាំនៃរដ្ឋាភិបាលក្រុមកណ្តាលនិយមឆ្វេង គឺគណបក្សការងារដែលជាគោលដៅនៃការរិះគន់ឥតឈប់ឈរ នៅឯកន្លែងប្រមូលផ្ដុំតវ៉ានោះ បានបញ្ជាក់ថា៖ «ចក្រភពអង់គ្លេស គឺជាប្រទេសមួយដែលត្រូវបានកសាងឡើងដោយមោទនភាព ដោយឈរលើមូលដ្ឋាននៃការអត់ឱន ភាពចម្រុះ និងការគោរព។ ទង់ជាតិរបស់យើងតំណាងឲ្យប្រទេសចម្រុះជាតិសាសន៍ ហើយយើងនឹងមិនចុះញ៉ម ចំពោះអ្នកដែលប្រើទង់ជាតិនេះជានិមិត្តរូបនៃអំពើហិង្សា ការភ័យខ្លាច និងការបែកបាក់គ្នាឡើយ»៕