យោងតាមការអះអាងរបស់មន្ទីរការពារអគ្គិភ័យហ្វីលីពីន បានឲ្យដឹងថា សង្កាត់រស់នៅអ្នកស្រុកនៅរដ្ឋធានីម៉ានីល ប្រទេសហ្វីលីពីន បានក្លាយជាគំនរបាក់បែកនៅថ្ងៃចន្ទនេះ ក្រោយអគ្គីភ័យដ៏ធំមួយ បានបំផ្លិចបំផ្លាញផ្ទះសម្បែងរាប់រយខ្នង និងធ្វើឲ្យមនុស្សជាង ១ពាន់គ្រួសារ ជម្លៀសខ្លួន ។

គួរឲ្យដឹងថា អគ្គីភ័យបានចាប់ផ្តើមឆាបឆេះឡើងកាលពីវេលាម៉ោង ៨យប់ ម៉ោងក្នុងស្រុកថ្ងៃសៅរ៍ ហើយនិងបានឆាបឆេះអស់រយៈពេលជាង ១០ម៉ោង ។

ក្រោយវិលត្រឡប់មកមើលផ្ទះរងការឆាបឆេះវិញ អ្នកនាង Arnalyn Buquel វ័យ ២២ឆ្នាំ និយាយថា ពួកយើងពុំដឹងថាត្រូវធ្វើអ្វីនោះទេ ។ វាពិបាកដឹងពីបញ្ហារបស់ពួកយើងខ្លំាងណាស់នៅពេលឥឡូវនេះ ពួកយើងមិនអាចស្រោចស្រង់អ្វីបានទាំងអស់ ។

 គ្មានសេចក្តីរាយការណ៍ពីគ្រោះថ្នាក់ដល់អាយុជីវិតនោះទេ បើទោះបីជាមនុស្សជាច្រើននាក់ បានរងរបួសក៏ដោយ ។ ក្រុមអ្នកស៊ើបអង្កេតកំពុងស្វែងរកមូលហេតុបណ្តាលឲ្យអគ្គីភ័យនេះកើតឡើង ខណៈប្រតិបត្តិការជួយសង្រ្គោះនៅបន្តនាថ្ងៃចន្ទនេះ សម្រាប់គ្រួសាររងផលប៉ះពាល់ ។

 ហ្វីលីពីនមានកំណត់ត្រាមិនច្បាស់លាស់នៃការពង្រឹងសុវត្ថិភាពអគ្គិភ័យនៅតាមអគារ ផ្ទះ និងការិយាល័យ ជាក់ស្តែងកាលពីខែសីហាកន្លងទៅ មនុស្ស ១១នាក់ បានស្លាប់ ក្រោយអគារផ្ទះល្វែងកម្ពស់ ៥ជាន់មួយខ្នង រងការឆាបឆេះគ្មានសល់នៅសង្កាត់ Chinatown ស្ថិតក្នុងទីក្រុងម៉ានីល ៕