បាល់ទាត់៖ ក្រុមជំរើសជាតិអេហ្ស៊ីបបានបន្តដំណើរឡើងវគ្គ ៨ក្រុមចុងក្រោយនៃការប្រកួតបាល់ទាត់ជើងឯកទ្វីបអាហ្វ្រិក Africa Cup of Nations បន្ទាប់ពីជ័យជំនះលើកូឌីវ័រដោយបាល់ ១១ម៉ែត្រកាត់សេចក្តី។ ខ្សែការពារក្រុមបិសាចក្រហម Manchester United, Eric Bailly បានបង្ហាញទំរង់យ៉ាងល្អដោយជួយបានច្រើនក្នុងតំបន់ការពារ។
តែ Eric Bailly ដដែលក៏ជាអ្នកស៊ុតបាល់ ១១ម៉ែត្រកាត់សេចក្តីមិនចូលផងដែរ ខណៈខ្សែប្រយុទ្ធ Liverpool, Mohamed Salah គឺជាអ្នកស៊ុតសំរេចគ្រាប់ជ័យជំនះចុងក្រោយឱ្យក្រុមអេហ្ស៊ីប។ មុនឡើងមកដល់វគ្គនេះកូឌីវ័រដែលជាអតីតជើងឯក ២សម័យនោះបានយកឈ្នះម្ចាស់ការពារជើងឯកអាល់ហ្សេរីនៅវគ្គវិលជុំក្នុងពូល ខណៈអេហ្ស៊ីបជាក្រុមលេខ ២ ក្នុងពូលក្រោយចាញ់នីហ្សេរីយ៉ាប្រកួតដំបូង។ សូមបញ្ជាក់ថា អេហ្ស៊ីបដែលធ្លាប់ឈ្នះជើងឯកបាល់ទាត់ទ្វីបអាហ្វ្រិកនេះច្រើនជាងគេដល់ទៅ ៧លើកនឹងត្រូវជួបជាមួយម៉ារ៉ុកនៅថ្ងៃអាទិត្យនេះនៅទីក្រុង Yaounde ប្រទេសកាមេរូន។
ចំណែកមួយគូទៀតយប់មិញ ក្រុមអេក្វាទ័រហ្គីណេបានទំលាក់ម៉ាលីគួរឱ្យភ្ញាក់ផ្អើលដោយបាល់ ១១ម៉ែត្រកាត់សេចក្តីផងដែរ។ បន្ទាប់ពីគ្មានក្រុមស៊ុតបញ្ចូលទីពេញ ៩០នាទី និងម៉ោងបន្ថែម ១៥នាទីពីរដងទៀត ក្រុមទាំងពីរត្រូវកាត់សេចក្តីដោយបាល់ ១១ម៉ែត្រ។ អ្នកចាំទីវ័យ ២០ឆ្នាំរបស់អេក្វាទ័រហ្គីណេ Jesus Owono បានក្លាយជាវីរបុរសរបស់អេក្វាទ័រហ្គីណេ ក្រោយសង្គ្រោះបាល់បានពីរលើក។ អេក្វាទ័រហ្គីណេធ្លាប់ឡើងដល់វគ្គពាក់កណ្តាលផ្តាច់ព្រ័ត្រម្តងកាលពីឆ្នាំ២០១៥ នោះនឹងត្រូវជួបជាមួយសេណេហ្កាល់នៅវគ្គ ៨ក្រុមចុងក្រោយ៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
