ក្រសួងការពារជាតិរបស់ចក្រភពអង់គ្លេស នៅថ្ងៃចន្ទ (ទី១៥ ខែកញ្ញា) នេះ បានប្រាប់ឲ្យដឹងថា ចក្រភពអង់គ្លេសបានហាមប្រាមជនជាតិអ៊ីស្រាអែលមិនឲ្យចូលរៀននោះឡើយ នៅសាលាដ៏ល្បីល្បាញសិក្សាផ្នែកការពារជាតិ នៅទីក្រុងឡុងដ្រ៏ ដោយសារការកើនឡើងនូវសង្គ្រាម នៅតំបន់ហ្កាហ្សា ជាការសម្រេចដែលនាំឲ្យមានការខឹងសម្បាពីអ៊ីស្រាអែល។

ទោះបីជាចក្រភពអង់គ្លេសនៅតែជាសម្ព័ន្ធមិត្តជិតស្និទ្ធរបស់អ៊ីស្រាអែលក៏ដោយ ក៏ថ្មីៗនេះ ប្រទេសនេះបានព្យាយាមដាក់សម្ពាធលើរដ្ឋាភិបាលអ៊ីស្រាអែល ជុំវិញជម្លោះ ដោយកាលពីខែកក្កដា បានគំរាមទទួលស្គាល់រដ្ឋប៉ាឡេស្ទីន ប្រសិនបើអ៊ីស្រាអែលមិនចាត់វិធានការ ដើម្បីបន្ធូរបន្ថយការឈឺចាប់ នៅក្នុងដែនដីនេះទេ។

ចំណាត់ការចុងក្រោយនេះ មានន័យថា នៅឆ្នាំក្រោយ និស្សិតអ៊ីស្រាអែល នឹងត្រូវបានបដិសេធមិនឲ្យចូលរៀននៅសាលា Royal College of Defense Studies ដែលផ្តល់វគ្គសិក្សាក្រោយបញ្ចប់សិក្សា ជាការបណ្ដុះបណ្ដាលយុទ្ធសាស្ត្រអន្តរជាតិដល់និស្សិតមកពីចក្រភពអង់គ្លេស និងជុំវិញពិភពលោក។

ការសម្រេចនេះកើតឡើងបន្ទាប់ពីមានប្រកាសរបស់អ៊ីស្រាអែល កាលពីខែសីហា អំពីផែនការបង្កើនជម្លោះ ដោយឆ្ពោះទៅរកការកាន់កាប់ទីក្រុង Gaza ជាទីដែលប្រជាជនប៉ាឡេស្ទីនប្រហែល ១លាននាក់ បានជ្រកកោន ក្នុងគោលបំណងលុបបំបាត់ក្រុមសកម្មប្រយុទ្ធហាម៉ាស។

អ្នកនាំពាក្យក្រសួងការពារជាតិ ដែលជាម្ចាស់សាលានេះ បាននិយាយថា៖ «ការសម្រេចរបស់រដ្ឋាភិបាលអ៊ីស្រាអែល ក្នុងការបង្កើនប្រតិបត្តិការយោធារបស់ខ្លួន នៅតំបន់ហ្កាហ្សា គឺជារឿងមិនត្រឹមត្រូវ។ ដូច្នេះយើងបានសម្រេចផ្អាកការចូលរួមរបស់អ៊ីស្រាអែលនាពេលអនាគត នៅក្នុងវគ្គសិក្សា ដែលគ្រប់គ្រងដោយចក្រភពអង់គ្លេស៕