ភ្នំពេញ៖ សម្រាប់វិស័យកសិកម្មនៅកម្ពុជាក្នុងឆ្នាំ២០២១ ទោះមានវិបត្តិកូវីដ-១៩យ៉ាងណាក្ដី កម្ពុជានៅតែអាចរក្សាកំណើនទាំងការផលិត និងការនាំចេញ។ ជាក់ស្ដែង កម្ពុជាសម្រេចបានផលិតកម្មដំណាំជាង ៣៥លានតោន ដោយមានតម្លៃតាមការប៉ានស្មានសរុបជាង ១០ពាន់លានដុល្លារ។

ពាក់ព័ន្ធនឹងវិស័យកសិកម្មក្នុងឆ្នាំ ២០២១កន្លងទៅនេះ គឺកម្ពុជាសម្រេចបានលទ្ធផលយ៉ាងល្អប្រសើរ ទាំងការផលិត ការនាំចេញ និងតម្លៃសរុបទៅលើផលិតកម្មដំណាំដែលផលិតបាន។

នេះជាការបញ្ជាក់របស់ ឯកឧត្តម ងិន ឆាយ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានកសិកម្ម ក្នុងឱកាសកិច្ចប្រជុំបូកសរុបលទ្ធផលការងារអនុវិស័យដំណាំកសិកម្មឆ្នាំ ២០២១ និងលើកទិសដៅឆ្នាំ ២០២២។

ឯកឧត្តម បានបញ្ជាក់ថា កម្ពុជាមានកំណើនផលិតកម្មដំណាំពីជាង ២៩លានតោន នៅឆ្នាំ២០២០ ដល់ជាង ៣៥លានតោន នៅឆ្នាំ២០២១ ពោលគឺបានកើនឡើងជាង២០% ក្នុងនោះ ផលិតកម្មដំណាំស្រូវបានកើនឡើង ១១,៦% ផលិតកម្មដំណាំសាកវប្បកម្មបានកើនឡើង១៦,៥% និងផលិតកម្មដំណាំឧស្សាហកម្មបានកើនឡើង៣៤,៥% រីឯការនាំចេញផលិតផលកសិកម្មក៏បាន​កើនឡើង​យ៉ាង​ប្រសើរពី ៤,៨៧លានតោន ដល់ ៧,៩៨លានតោនគឺ ៦៤%។ ជាមួយគ្នានេះតាមការប៉ាន់ស្មានទំហំទឹកប្រាក់ដែលទទួលបានពីផលិតកម្មដំណាំឆ្នាំ២០២១ មាន​ប្រមាណ ១០ពាន់លានដុល្លារអាមេរិកដែលមានការកើនឡើងចំនួន២៤,៨២%។

ពាក់ព័ន្ធនឹងកំណើនផលិតកម្មកសិកម្មដែលសម្រេចបានក្នុងឆ្នាំ ២០២១កន្លងទៅនេះ ​ឯកឧត្តម វេង សាខុន រដ្ឋមន្រីក្រសួងកសិកម្ម បានលើកឡើងដែរថា ​ក្នុងបរិបទកូវីដ-១៩នេះ ក្រសួងកសិកម្ម បាន​ខិតខំ​បំពេញ​កាតព្វកិច្ចរបស់​ខ្លួន​យ៉ាងសកម្ម សំដៅប្រែក្លាយកសិកម្មកម្ពុជា​ឱ្យក្លាយជាកសិកម្មទំនើប​មាន​លក្ខណៈប្រកួតប្រជែង​ បរិយាប័ន្ន ​ធន់នឹងការប្រែប្រួលអាកាសធាតុ និងនិរន្តរភាព សំដៅបង្កើន​ប្រាក់​ចំណូលគ្រួសារកសិករតាមអភិក្រមនិងវិសាលភាពថ្មី ដោយត្រូវប្រែក្លាយវិស័យនេះ​ពី​ដំណាក់កាល​នៃការអភិវឌ្ឍតាមបែប​យថាផល​ឈានទៅរកដំណាក់កាលថ្មី ដែលផ្តោតលើ​ប្រពល​វប្បកម្ម ព្រមទាំងលើកកម្ពស់ពិពិធភាវូប-នីយកម្មដំណាំដែលមានសក្តានុពល​ប្រកប​ដោយភាព​វៃឆ្លាត ​មានផលចំណេញ​ខ្ពស់ក្នុងបរិបទនៃតម្រូវការទីផ្សារទាំងក្នុង និងក្រៅប្រទេសប្រកបដោយ​គុណភាព និងសុវត្ថិភាព ក៏ដូចជាការទាក់ទាញវិនិយោគិនផងដែរ។

យ៉ាងណាម៉ិញ​កម្ពុជាក្នុងពេលបច្ចុប្បន្ននេះ​ ពុំទាន់មានទាន់អាចសម្រេច ទាន់អាចសម្រេចនូវគោល​ដៅ​នាំចេញអង្ករមួយលានតោនក្នុងមួយឆ្នាំនៅឡើយទេ ​ដោយសារតែមានដៃគូប្រជែងដ៏ខ្លាំងដូចជា​ប្រទេសវៀតណាម​ក្នុងមួយឆ្នាំនាំចេញប្រមាណប្រាំលានតោន ប្រទេសថៃប្រមាណប្រាំមួយ​លានតោន ​ឥណ្ឌាក៏ជាប្រទេសនាំចេញអង្ករដ៏ធំមួយផងដែរ៕ អត្ថបទ៖ គឹមហុក