ទីភ្នាក់ងារសារព័ត៌មានរដ្ឋរុស្ស៊ី TASS បាននិយាយថា កងទ័ពឥណ្ឌាបានចូលរួមក្នុងសមយុទ្ធយោធា Zapad-2025 ដឹកនាំដោយរុស្ស៊ី ដោយបញ្ជាក់ពីទំនាក់ទំនងជិតស្និទ្ធរបស់ទីក្រុងមូស្គូជាមួយទីក្រុងញូវដែលី ខណៈទំនាក់ទំនងជាមួយសហរដ្ឋអាមេរិកបានជួបភាពតានតឹងដោយសារតែការដំឡើងពន្ធដ៏ច្រើនដោយលោកប្រធានាធិបតី Donald Trump។

ក្រសួងការពារជាតិឥណ្ឌា បានបញ្ជាក់ថា ក្រសួងបានបញ្ជូនបុគ្គលិកកងកម្លាំងប្រដាប់អាវុធចំនួន៦៥នាក់ ទៅចូលរួមក្នុងសមយុទ្ធយោធារយៈពេលប្រាំថ្ងៃ ជាការបង្ហាញពីការសំញែងសាច់ដុំធ្វើឡើងរួមគ្នាដោយរុស្ស៊ីនិងបេឡារុស ដើម្បីសាកល្បងការត្រៀមខ្លួនប្រយុទ្ធរបស់ខ្លួន ក្នុងករណីមានការឈ្លានពាន។ សមយុទ្ធដែលបង្ហាញកម្លាំងទាហាន១០០.០០០នាក់ ជាការបង្ហាញកម្លាំងដែលរួមមានទាំងយន្តហោះទម្លាក់គ្រាប់បែកនិងនាវាចម្បាំងមានសមត្ថភាពបំពាក់នុយក្លេអ៊ែរ ធ្វើឡើងក្នុងពេលមានភាពតានតឹងកាន់តែខ្លាំងជាមួយបណ្តាប្រទេសសម្ព័ន្ធយោធាណាតូ ដែលកើតឡើងប៉ុន្មានថ្ងៃបន្ទាប់ពីការបាញ់ទម្លាក់យានដ្រូនរបស់រុស្ស៊ីនៅក្នុងប្រទេសប៉ូឡូញ កាលពីសប្តាហ៍មុន។ លោកPutin ដែលស្លៀកពាក់ឯកសណ្ឋានយោធាបាននិយាយថា «ថ្ងៃនេះយើងកំពុងធ្វើលំហាត់យុទ្ធសាស្ត្រ Zapad 2025»។

សារព័ត៌មាន TASS បានរាយការណ៍ថា ឥណ្ឌាពុំមែនជាប្រទេសមហាអំណាចបរទេសតែមួយដែលមកចូលរួមក្នុងសមយុទ្ធនេះទេ វាក៏មាន«កងកម្លាំងទទួលភារកិច្ច និងយោធា» មកពីប្រទេសអ៊ីរ៉ង់ បង់ក្លាដែស ប៊ូគីណាហ្វាសូ សាធារណរដ្ឋប្រជាធិបតេយ្យកុងហ្គោ (DRC) និងប្រទេសម៉ាលី។ ប៉ុន្តែការចូលរួមរបស់ប្រទេសឥណ្ឌា គឺក្នុងគោលបំណងពង្រឹង«ស្មារតីនៃកិច្ចសហប្រតិបត្តិការ និងការជឿទុកចិត្តគ្នាទៅវិញទៅមក»ជាមួយរុស្ស៊ី នឹងបានធ្វើឱ្យមានមន្ទិលសង្ស័យពេលមានសញ្ញាថាសហរដ្ឋអាមេរិកអាចនឹងបាត់បង់សម្ព័ន្ធមិត្តដ៏សំខាន់មួយនៅអាស៊ី។ ភាពតានតឹងបានកើតឡើងរវាងប្រទេសទាំងពីរកាលពីខែមុន បន្ទាប់ពីរដ្ឋបាល លោក Trump បានដាក់ពន្ធ៥០ភាគរយលើការនាំចូលពីប្រទេសឥណ្ឌាដោយចោទប្រកាន់ទីក្រុង New Delhi ថាបានជំរុញការវាយប្រហារដ៏បង្ហូរឈាមរបស់ទីក្រុងមូស្គូលើអ៊ុយក្រែន ដោយការទិញប្រេងពីរុស្ស៊ី។