សហរដ្ឋអាមេរិក បានចេញនូវទណ្ឌកម្មថ្មីមួយដាក់ទៅលើប្រទេសអ៊ីរ៉ង់ ដោយដាក់គោលដៅលើបុគ្គលនិងអង្គភាពដែលខ្លួននិយាយថាមានជាប់ពាក់ព័ន្ធក្នុងការផ្ទេរមូលនិធិខុសច្បាប់ផ្តល់ប្រយោជន៍ដល់សកម្មភាពយោធារបស់ប្រទេសនេះ។

ការិយាល័យគ្រប់គ្រងទ្រព្យសកម្មបរទេសរបស់ក្រសួងរតនាគារសហរដ្ឋអាមេរិក (OFAC) បានបញ្ជាក់កាលពីថ្ងៃអង្គារថា ខ្លួនបានដាក់ទណ្ឌកម្មលើបុគ្គលនិងក្រុមហ៊ុនរបស់អ៊ីរ៉ង់រាប់សិបបន្ថែមទៀតដែលមានមូលដ្ឋាននៅទីក្រុងហុងកុង និងប្រទេសអារ៉ាប់រួម។

ការិយាល័យគ្រប់គ្រងទ្រព្យសកម្មបរទេសរបស់ក្រសួងរតនាគារសហរដ្ឋអាមេរិក (OFAC) និយាយថា គោលដៅទាំងនោះ បានជួយដកមូលនិធិសម្រាប់ជាប្រយោជន៍ដល់អង្គភាពឆ្មាំបដិវត្តន៍អ៊ីស្លាម (IRGC) និងក្រសួងការពារជាតិអ៊ីរ៉ង់។ ក្រសួងរតនាគារអាមេរិកបាននិយាយបន្ថែមថា លុយមួយចំនួនបានមកពីការលក់ប្រេងរបស់អ៊ីរ៉ង់។

ក្រសួងនិយាយថា «បណ្តាញ និងធនាគារស្រមោល» របស់អ៊ីរ៉ង់បែបនេះ ដំណើរការដោយអ្នកសម្របសម្រួលហិរញ្ញវត្ថុខុសច្បាប់គួរឱ្យទុកចិត្ត បានរំលោភលើប្រព័ន្ធហិរញ្ញវត្ថុអន្តរជាតិ និងគេចវេសចេញពីការដាក់ទណ្ឌកម្មដោយការសម្អាតប្រាក់តាមរយៈក្រុមហ៊ុននៅក្រៅប្រទេស និងរូបិយប័ណ្ណគ្រីបតូ»។

លោក John K Hurley អនុរដ្ឋមន្ត្រីក្រសួងរតនាគារសហរដ្ឋអាមេរិកទទួលបន្ទុកអំពើភេរវកម្ម និងចារកម្មហិរញ្ញវត្ថុ បាននិយាយថា រដ្ឋបាល លោក Trump នឹងបន្តបង្អាក់ដល់ប្រាក់ដែលហូរចូលទៅក្នុង «កម្មវិធីអាវុធរបស់ប្រទេសអ៊ីរ៉ង់ និងសកម្មភាពដ៏គ្រោះថ្នាក់នៅតំបន់មជ្ឈិមបូព៌ា និងហួសពីនេះ»។

ចំណាត់ការនេះធ្វើឡើងជាផ្នែកមួយនៃគោលដៅរបស់លោកប្រធានាធិបតីសហរដ្ឋអាមេរិក Donald Trump ក្នុងការជំរុញការនាំចេញប្រេងរបស់អ៊ីរ៉ង់ឲ្យ «ដល់កម្រិតសូន្យ»។