កាណាដា៖ នាយករដ្ឋមន្ត្រីកាណាដាលោក Justin Trudeau និយាយថា ប្រទេសកាណាដាកំពុងពង្រីកបេសកកម្មរបស់ខ្លួនក្នុងការបណ្តុះបណ្តាលទាហានអ៊ុយក្រែនរយៈពេល ៣ឆ្នាំ និងមានផែនការបង្កើនប្រតិបត្តិការ។ លោក Trudeau និយាយថា លោកបានអនុញ្ញាតឲ្យយោធាដាក់ពង្រាយបុគ្គលិកចំនួន ៦០នាក់បន្ថែមទៀតដើម្បីចូលរួមជាមួយកងទ័ព ២០០នាក់ដែលមានស្រាប់នៅលើទឹកដីនេះ ជាមួយនឹងសមត្ថភាពបន្ថែមដើម្បីបង្កើនចំនួននេះរហូតដល់ ៤០០នាក់។ វាជាផ្នែកមួយនៃការប្តេជ្ញាចិត្តក្នុងការចំណាយទឹកប្រាក់ ២៦៨លានដុល្លារអាមេរិក។
លោក Trudeau និយាយថា ប្រទេសរុស្សីកំពុងប្រើប្រាស់យោធារបស់ខ្លួន ដែលអាចជាការគំរាមដល់លទ្ធិប្រជាធិបតេយ្យឯករាជ្យ ក្នុងកិច្ចប្រឹងប្រែងដើម្បីព្យាយាមឲ្យអ៊ុយក្រែនបង្អោនខ្លួនទៅតាមឆន្ទៈរបស់ខ្លួន។ លោក Trudeau និយាយថា កិច្ចប្រឹងប្រែងនេះក៏រួមមានទាំងការផ្តល់ឧបករណ៍មិនបង្កគ្រោះថ្នាក់ ការចែករំលែកព័ត៌មានសម្ងាត់ និងការគាំទ្រដើម្បីប្រយុទ្ធប្រឆាំងការវាយប្រហារតាមអ៊ីនធឺណិត។ បេសកកម្មរបស់ប្រទេសកាណាដាមានបំណងគាំទ្រកងកម្លាំងអ៊ុយក្រែន ដូច្នេះប្រទេសនេះអាចការពារអធិបតេយ្យភាព សន្តិសុខ និងបូរណភាពទឹកដីរបស់ខ្លួន។ លោក Trudeau និយាយថា រដ្ឋមន្ត្រីការពារជាតិលោក Anita Anand នឹងធ្វើដំណើរទៅកាន់ប្រទេសឡាតវី និងអ៊ុយក្រែន ដើម្បីពិនិត្យមើលកងទ័ពកាណាដានៅពេលខាងមុខនេះ។ លោក Anand និយាយថា កាណាដាបានបណ្តុះបណ្តាលទាហានជាង ៣ម៉ឺននាក់នៅក្នុងប្រទេសអ៊ុយក្រែន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
