យោងតាមការសិក្សាស្រាវជ្រាវថ្មីមួយចេញផ្សាយនៅថ្ងៃពុធ (១៧ កញ្ញា) នេះបានឱ្យដឹងថា បម្រែបម្រួលអាកាសធាតុសកល បានជំរុញឱ្យសីតុណ្ហភាពក្នុងរដូវក្តៅឆ្នាំ២០២៥នេះ មានភាពខ្លាំងក្លាខុសធម្មតា ដែលសម្លាប់មនុស្សប្រមាណ ១៦.៥០០នាក់ ក្នុងទីក្រុងនានានៅទ្វីបអឺរ៉ុប ដោយធ្វើឱ្យភាពទៅរួចនៃការស្លាប់ដោយសារកម្ដៅសរុប ហក់ឡើងដល់ទៅជាង ៣ដង នៃអ្វីដែលអាចនឹងកើតមាន។

ការវិភាគនេះបង្ហាញពីការមើលឃើញដំបូងនៃឥទ្ធិពលរដូវក្តៅដែលក្តៅបំផុតទី៤ របស់អឺរ៉ុប ក្នុងកំណត់ត្រា ជាមួយនឹងរលកកម្ដៅជាបន្តបន្ទាប់ ដែលវាយប្រហារប្រទេសជាច្រើនរាប់ចាប់ពីអ៊ីតាលី រហូតដល់អាល្លឺម៉ង់ និងបារាំង។ សីតុណ្ហភាពបានឡើងដល់ ៤៦អង្សារសេ នៅអេស្ប៉ាញ និងព័រទុយហ្គាល់ ហើយបាននាំឱ្យមានការស្លាប់របស់កម្មករធ្វើការនៅទីវាលជាច្រើននាក់ក្នុងអេស្ប៉ាញ និងអ៊ីតាលី។

លោកស្រី Friederike Otto សាស្ត្រាចារ្យវិទ្យាសាស្ត្រអាកាសធាតុនៅអង់គ្លេស ដែលជាសហអ្នកនិពន្ធក្នុងការសិក្សានេះ ជាមួយស្ថាប័នផ្សេងៗទៀត បានព្រមានថា៖ "តួលេខនៅក្នុងការស្រាវជ្រាវទាំងនេះតំណាងឱ្យមនុស្សពិតប្រាកដដែលបានបាត់បង់ជីវិត ហើយប្រសិនបើការដុតឥន្ធនៈហ្វូស៊ីលនៅតែបន្ត នោះការស្លាប់នឹងកើនឡើងកាន់តែច្រើន"។

ការសិក្សាផ្សេងទៀតនាពេលកន្លងមកបានរកឃើញថា មនុស្សជាង ៦០.០០០នាក់ ទំនងជាស្លាប់ដោយសារកម្ដៅខ្លាំងនៅអឺរ៉ុប ក្នុងរដូវក្តៅឆ្នាំ២០២២ ហើយមនុស្សជាង ៤៧.០០០នាក់ ស្លាប់ក្នុងឆ្នាំ២០២៣។ អ្នកវិទ្យាសាស្រ្តព្រមានថា អឺរ៉ុបគឺជាទ្វីបដែលឡើងកម្ដៅលឿនបំផុតរបស់ពិភពលោក ហើយតំបន់មេឌីទែរ៉ាណេគឺជាចំណុចក្តៅសម្រាប់បម្រែប្រួលអាកាសធាតុ៕