ដោយដកស្រង់សម្តីពីមន្ត្រីទីក្រុងប្រ៊ុចសែល និងហ្សាការតា សារព័ត៌មាន Financial Times កាលពីថ្ងៃអង្គារ (ទី១៦ ខែកញ្ញា) បានរាយការណ៍ថា សហភាពអឺរ៉ុប (EU) និងឥណ្ឌូនេស៊ី បានឈានដល់ការបញ្ចប់នូវកិច្ចព្រមព្រៀងពាណិជ្ជកម្មមួយ ដែលនឹងត្រូវចុះហត្ថលេខានៅសប្តាហ៍ក្រោយ។

សេចក្ដីរាយការណ៍នោះ បានឲ្យដឹងថា ស្នងការពាណិជ្ជកម្ម EU គឺលោក Maros Sefcovic គ្រោងនឹងធ្វើទស្សនកិច្ច នៅប្រទេសឥណ្ឌូនេស៊ី ដើម្បីចុះហត្ថលេខាលើកិច្ចព្រមព្រៀងនេះ នាថ្ងៃទី២៣ ខែកញ្ញា។ ពាក់ព័ន្ធនឹងសេចក្ដីរាយការណ៍នេះ ទាំងការិយាល័យពាណិជ្ជកម្ម EU និងក្រសួងការបរទេសឥណ្ឌូនេស៊ី មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

យោងតាមសេចក្ដីរាយការណ៍នោះ បានឲ្យដឹងបន្ថែមថា ពន្ធនាំចូលរបស់ប្រធានាធិបតីអាមេរិក លោក Donald Trump ដែលដាក់លើភាគីទាំង២ បានធ្វើឲ្យកិច្ចពិភាក្សានេះកាន់តែត្រូវបានពន្លឿន។ សារព័ត៌មាន FT បានបញ្ជាក់ទៀតថា ឥណ្ឌូនេស៊ីបានប្រាប់ឲ្យដឹងថា កិច្ចព្រមព្រៀងនេះនឹងលុបចោលអតា្រពន្ធលើការនាំចេញ ៨០ភាគរយ ក្នុងរយៈពេលអនុវត្តពី ១ឆ្នាំ ទៅ ២ឆ្នាំ។

គួរបញ្ជាក់ថា កាលពីខែកក្កដា ប្រធានគណៈកម្មការអឺរ៉ុប លោកស្រី Ursula von der Leyen បាននិយាយថា កិច្ចព្រមព្រៀងនយោបាយមួយ ត្រូវបានឈានដល់ ដើម្បីជំរុញកិច្ចព្រមព្រៀងពាណិជ្ជកម្មសេរី រវាង EU និងឥណ្ឌូនេស៊ី ដែលត្រូវបានគេស្គាល់ថា ជាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ៕