សារព័ត៌មាន Financial Times នៅថ្ងៃពុធ (ទី១៧ ខែកញ្ញា) នេះ បានរាយការណ៍ថា និយតករអ៊ីនធឺណិតរបស់ប្រទេសចិន បានណែនាំឲ្យក្រុមហ៊ុនបច្ចេកវិទ្យាធំៗបញ្ឈប់ការទិញបន្ទះឈីបបញ្ញាសិប្បនិម្មិត (AI) របស់ក្រុមហ៊ុន Nvidia និងលុបចោលការបញ្ជាទិញដែលមានស្រាប់ ដែលជាផ្នែកមួយនៃការជំរុញយ៉ាងទូលំទូលាយ ដើម្បីកាត់បន្ថយការពឹងផ្អែកលើបច្ចេកវិទ្យារបស់សហរដ្ឋអាមេរិក។

ភាគហ៊ុនរបស់ក្រុមហ៊ុនអាមេរិកមួយនេះ បានធ្លាក់ចុះ ១ភាគរយ អំឡុងការជួញដូរមុនចូលទីផ្សារ។ រដ្ឋបាលអាមេរិកជាបន្តបន្ទាប់ បានរឹតបន្តឹងលទ្ធភាពចូលប្រើរបស់ប្រទេសចិន ចំពោះបន្ទះឈីបកម្រិតខ្ពស់ ដែលជំរុញឲ្យទីក្រុងប៉េកាំងដាក់សម្ពាធលើក្រុមហ៊ុនក្នុងស្រុក ឲ្យងាកចេញពីអ្នកផ្គត់ផ្គង់របស់អាមេរិក ដោយផ្ដល់ប៉ះពាល់ក្រុមហ៊ុននាំគេក្នុងឧស្សាហកម្មនេះ ដូចជា Nvidia នេះជាដើម។

ចំណាត់ការឲ្យបញ្ឈប់នេះកើតមានឡើងត្រឹមតែប៉ុន្មានថ្ងៃបន្ទាប់ពីប្រទេសចិន បានចោទប្រកាន់ក្រុមហ៊ុននេះថា បានរំលោភលើច្បាប់ប្រឆាំងភាពផ្តាច់មុខរបស់ខ្លួន ដែលជាការផ្ទុះឡើងនូវជម្លោះចុងក្រោយបំផុតនៅក្នុងសង្គ្រាមពាណិជ្ជកម្មជាមួយទីក្រុងវ៉ាស៊ីនតោន។

ដោយដកស្រង់សម្ដីមនុស្ស ៣នាក់ដែលដឹងអំពីបញ្ហានេះ សេចក្ដីរាយការណ៍បានបញ្ជាក់ថា រដ្ឋបាល Cyberspace នៃប្រទេសចិន (CAC) បានណែនាំក្រុមហ៊ុននានា ក្នុងនោះមានរួមទាំង ByteDance និង Alibaba ផងដែរ នៅក្នុងសប្តាហ៍នេះ ឲ្យបញ្ចប់ការធ្វើតេស្ត និងបញ្ជាទិញបន្ទះឈីប RTX Pro 6000D។

សេចក្ដីរាយការណ៍បានបន្ថែមថា ការហាមឃាត់ថ្មី គឺតឹងតែងជាងការណែនាំមុនរបស់និយតករ ដែលផ្តោតលើបន្ទះឈីប H20 ដែលជាជំនាន់មុននៃបន្ទះឈីប AI របស់ក្រុមហ៊ុន Nvidia ដែលត្រូវបានផលិតឡើងសម្រាប់តែប្រទេសចិន។ ទាំងក្រុមហ៊ុន Nvidia, Alibaba និង Bytedance មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយរបស់សារព័ត៌មាន Reuters៕