អង្គការគ្រូពេទ្យគ្មានព្រំដែន (MSF) បាននិយាយកាលពីថ្ងៃពុធ (១៧ កញ្ញា) ថា ខ្លួនមានការភ្ញាក់ផ្អើល និងខឹងសម្បារយ៉ាងខ្លាំងជាមួយនឹងការស្លាប់របស់គិលានុបដ្ឋាកម្នាក់របស់ខ្លួន កាលពីថ្ងៃអង្គារ ដោយសារតែរបួសពីគ្រាប់ផ្លោងនៃការវាយប្រហារតាមអាកាសរបស់អ៊ីស្រាអែល នៅជិតជម្រកតង់ដែលបុគ្គលិក MSF រូបនេះស្នាក់នៅកាលពី ៥ថ្ងៃមុននោះ។

គិលានុបដ្ឋាកនោះឈ្មោះ Hussein Alnajjar គឺជាឪពុកមានកូន ៣នាក់ ដែលធ្វើការនៅគ្លីនិកវេជ្ជសាស្ត្ររបស់អង្គការអន្តរជាតិ MSF នៅក្រុង Deir al Balah និងក្រុង Khan Younis របស់ដែនដីហ្កាហ្សាស្រ្ទីប តាំងពីខែមករា ឆ្នាំមុនមក។ ប្អូនថ្លៃ និងក្មួយប្រុសរបស់បុរសរូបនេះ ក៏បានរងរបួសក្នុងការវាយប្រហារតាមអាកាសដូចគ្នាដែរ។

គិលានុបដ្ឋាករូបនេះគឺជាបុគ្គលិកទី១៣ហើយរបស់អង្គការគ្រូពេទ្យគ្មានព្រំដែន ដែលត្រូវបានសម្លាប់ចាប់តាំងពីសង្រ្គាមនៅតំបន់ហ្កាហ្សា បានចាប់ផ្តើមមក។ អង្គការនេះបាននិយាយក្នុងសេចក្តីថ្លែងការណ៍មួយថា "MSF ខឹងសម្បារខ្លាំងណាស់ដែលអំពើហិង្សាយោធា នៅតែបន្តសម្លាប់បុគ្គលិកប៉ាឡេស្ទីនរបស់អង្គការវេជ្ជសាស្រ្តសម្បុរសធម៌មួយនេះ" ។

យោងតាមទិន្នន័យចុងក្រោយរបស់ការិយាល័យសម្របសម្រួលកិច្ចការមនុស្សធម៌OCHA បានឱ្យដឹងថា បុគ្គលិកជំនួយយ៉ាងតិច ៥៤០នាក់ ត្រូវបានសម្លាប់ ក្នុងការវាយលុករយៈពេលជិត ២ឆ្នាំរបស់អ៊ីស្រាអែល ប្រឆាំងនឹងក្រុមសកម្មប្រយុទ្ធហាម៉ាស។ គួររម្លឹកថា សង្រ្គាមហ្កាហ្សា ត្រូវបានបញ្ឆេះឡើងដោយសារតែការវាយប្រហារឆ្លងព្រំដែនពីក្រុមយុទ្ធជនដឹកនាំដោយហាម៉ាស ទៅលើភាគខាងត្បូងអ៊ីស្រាអែល កាលពីថ្ងៃទី៧ ខែតុលា ឆ្នាំ២០២៣៕