អ្នកស៊ើបអង្កេតរបស់អង្គការសហប្រជាជាតិ (UN) ដែលនៅសប្តាហ៍នេះចោទប្រកាន់អ៊ីស្រាអែលពីបទប្រព្រឹត្តអំពើប្រល័យពូជសាសន៍ នៅតំបន់ហ្កាហ្សា បាននិយាយថា លោកស្រីមើលឃើញនូវភាពស្រដៀងគ្នាទៅនឹងការសម្លាប់នៅប្រទេសរ៉្វាន់ដា ហើយលោកស្រីសង្ឃឹមថា ថ្ងៃណាមួយ មេដឹកនាំអ៊ីស្រាអែលនឹងត្រូវជាប់ពន្ធនាគារ។

លោកស្រី Navi Pillay ជាអតីតចៅក្រមអាហ្រ្វិកខាងត្បូងដែលដឹកនាំសាលាក្តីអន្តរជាតិ សម្រាប់អំពើប្រល័យពូជសាសន៍ នៅរ្វ៉ាន់ដា ឆ្នាំ១៩៩៤ និងបានបម្រើការជាប្រធានសិទ្ធិមនុស្ស UN បានទទួលស្គាល់ថា យុត្តិធម៌គឺជាដំណើរការដ៏យឺតយ៉ាវ។

ក្នុងបទសម្ភាសន៍ជាមួយប្រព័ន្ធផ្សព្វផ្សាយមួយ លោកស្រី Pillay បាននិយាយថា ប៉ុន្តែដូចសម្ដីរបស់អតីតអ្នកប្រឆាំងនឹងការបែងចែកជាតិសាសន៍ នៅអាហ្វ្រិកខាងត្បូង គឺលោក Nelson Mandela ដែលបាននិយាយថា វាហាក់ដូចជាមិនអាចទៅរួចនោះឡើយ រហូតទាល់តែវាសម្រេចបាន។ លោកស្រីបានបន្ថែមថា ខ្ញុំគិតថា វាអាចទៅរួច ដែលនឹងមានការចាប់ខ្លួន និងការកាត់ទោស នាពេលអនាគត។

គណៈកម្មការស៊ើបអង្កេតអន្តរជាតិឯករាជ្យ (COI) របស់លោកស្រី Pillay ដែលមិននិយាយតំណាងឲ្យ UN បានចេញរបាយការណ៍ដ៏គួរឲ្យភ្ញាក់ផ្អើល កាលពីថ្ងៃអង្គារ ដោយសន្និដ្ឋានថា «អំពើប្រល័យពូជសាសន៍ កំពុងកើតឡើងនៅតំបន់ហ្កាហ្សា» ជាអ្វីដែលអ៊ីស្រាអែលបដិសេធយ៉ាងដាច់អហង្ហារ។

ក្រុមអ្នកស៊ើបអង្កេតក៏បានសន្និដ្ឋានថា ប្រធានាធិបតីអ៊ីស្រាអែល លោក Isaac Herzog នាយករដ្ឋមន្ត្រី លោក Benjamin Netanyahu និងអតីតរដ្ឋមន្ត្រីការពារជាតិ លោក Yoav Gallant បាន «ញុះញង់ឲ្យមានការប្រព្រឹត្តអំពើប្រល័យពូជសាសន៍»៕