ការស្ទង់មតិថ្មីលើមនុស្សជាង ៣៦.៣០០នាក់ នៅទូទាំងពិភពលោក បានបង្ហាញពីការគាំទ្រយ៉ាងធំធេង ចំពោះការធ្វើកិច្ចសហប្រតិបត្តិការអន្តរជាតិបន្ថែមទៀត ជុំវិញបញ្ហានានា ដែលរួមមានទាំងពាណិជ្ជកម្ម សុខភាពសកល អាកាសធាតុ និងភាពក្រីក្រ ប៉ុន្តែបានផ្តល់ជំនឿទុកចិត្តទាបខ្លាំងណាស់ ចំពោះស្ថាប័នធំៗរបស់ពិភពលោក ដូចជាអង្គការសហប្រជាជាតិ (UN) មូលនិធិរូបិយវត្ថុអន្តរជាតិ (IMF) និងស្ថាប័នផ្សេងទៀត។

ការស្ទង់មតិដែលត្រូវបានចាត់តាំងដោយមូលនិធិ Rockefeller និងធ្វើឡើងក្នុងប្រទេសចំនួន ៣៤ ចាប់ពីថ្ងៃទី៨ ខែសីហា ដល់ថ្ងៃទី១០ ខែកញ្ញា ផ្តល់នូវរូបភាពមិនល្អនៃការមានទំនុកចិត្ត លើស្ថាប័នពហុភាគី នៅពេលដែលសហរដ្ឋអាមេរិក និងប្រទេសដែលមានសេដ្ឋកិច្ចជឿនលឿនផ្សេងទៀត កំពុងកាត់បន្ថយជំនួយអភិវឌ្ឍន៍ និងការផ្តល់មូលនិធិ សម្រាប់គម្រោងសកល។

ទោះបីជាមានការកាត់បន្ថយការចំណាយលើការអភិវឌ្ឍ និងការកើនឡើងនូវវោហាសាស្ត្រជាតិនិយម នៅជុំវិញពិភពលោកក៏ដោយ ក៏ ៧៥ភាគរយនៃអ្នកដែលត្រូវបានស្ទង់មតិ បាននិយាយថា ពួកគេគាំទ្រកិច្ចសហប្រតិបត្តិការជាសកល ប្រសិនបើវាត្រូវបានបង្ហាញថា អាចដោះស្រាយបញ្ហាប្រកបដោយប្រសិទ្ធភាព ហើយមានតែ ៤២ភាគរយប៉ុណ្ណោះដែលយល់ឃើញថា វាជាផលប្រយោជន៍ផ្ទាល់ខ្លួនរបស់ពួកគេ។

៩នាក់ ក្នុងចំណោមមនុស្ស ១០នាក់ដែលត្រូវបានស្ទង់មតិ បានប្រាប់ថា កិច្ចសហប្រតិបត្តិការពិភពលោកមានសារៈសំខាន់ ក្នុងការដោះស្រាយបញ្ហាការងារ ៩២ភាគរយចង់បានកិច្ចសហប្រតិបត្តិការ ពាក់ព័ន្ធនឹងពាណិជ្ជកម្ម និងការអភិវឌ្ឍសេដ្ឋកិច្ច ៩៣ភាគរយ ពាក់ព័ន្ធនឹងសន្តិសុខស្បៀង និងទឹក ហើយ ៩១ភាគរយ ពាក់ព័ន្ធនឹងសុខភាពសកល។

តែទោះជាយ៉ាងណាក្ដី ការជឿទុកចិត្តលើស្ថាប័នសកលនានា មានកម្រិតទាបខ្លាំង។ មានតែ ៥៨ភាគរយនៃអ្នកដែលត្រូវបានស្ទង់មតិប៉ុណ្ណោះ ជឿជាក់លើ UN ដែលកំពុងរៀបចំត្រៀមសម្រាប់ការជួបជុំមហាសន្និបាត នាសប្តាហ៍ក្រោយ ៦០ភាគរយ ផ្ដល់ទំនុកចិត្តលើអង្គការសុខភាពពិភពលោក (WHO) ហើយ IMF មានអ្នកគាំទ្រ ៤៤ភាគរយ៕