នាយករដ្ឋមន្ត្រីកាណាដាលោក Mark Carney ទៅដល់ទីក្រុងម៉ិកស៊ិកហើយ នៅថ្ងៃព្រហស្បតិ៍ (ទី១៨ ខែកញ្ញា) នេះ សម្រាប់បេសកកម្មរយៈពេល ២ថ្ងៃដែលត្រូវបានធ្វើឡើង ដើម្បីកែលម្អទំនាក់ទំនងដែលជួបនឹងភាពតានតឹងថ្មីៗនេះ និងស្វែងរកគោលជំហររួម នៅក្នុងកិច្ចពិភាក្សាពាណិជ្ជកម្មដ៏សំខាន់ជាមួយសហរដ្ឋអាមេរិក។

លោក Carney គ្រោងនឹងជួបជាមួយប្រធានាធិបតីម៉ិកស៊ិក លោកស្រី Claudia Sheinbaum សម្រាប់អ្វីដែលលោកបាននិយាយថា នឹងជាការពិភាក្សាដ៏ទូលំទូលាយ លើបញ្ហានានា ដូចជាទំនាក់ទំនងអាជីវកម្ម សន្តិសុខ និងសុខភាព។ កាលពីថ្ងៃអង្គារ លោកបានប្រាប់អ្នកសារព័ត៌មាននៅទីក្រុង Ottawa ថា៖ «នេះគឺជាទំនាក់ទំនងដ៏សំខាន់ សម្រាប់ប្រទេសកាណាដា»។

គួរបញ្ជាក់ថា ដំណើរទស្សនកិច្ចរបស់លោក Carney នឹងក្លាយជាដំណើរទស្សនកិច្ចទ្វេភាគីលើកដំបូងរបស់នាយករដ្ឋមន្ត្រីកាណាដាទៅកាន់ម៉ិកស៊ិក ក្នុងរយៈពេល ៨ឆ្នាំ។ មន្ត្រីកាណាដាដែលធ្វើបទសម្ភាសន៍ជាមួយអ្នកសារព័ត៌មានកាលពីថ្ងៃពុធ បានពណ៌នាអំពីទំនាក់ទំនងល្អ ប៉ុន្តែបានទទួលស្គាល់ថា ពួកគេអាចកាន់តែជិតស្និទ្ធជាងនេះ។

កាណាដា ម៉ិកស៊ិក និងសហរដ្ឋអាមេរិក បានបន្តសន្ធិសញ្ញាពាណិជ្ជកម្មសេរីប្រចាំទ្វីប ក្នុងឆ្នាំ២០១៨ ប៉ុន្តែការពិភាក្សា អំពីសាមគ្គីភាព បានជួបនឹងភាពអាប់អួ នៅពេលដែលប្រធានាធិបតីអាមេរិកលោក Donald Trump បានដាក់ចេញវិធានាការដំឡើងពន្ធគយ។ ចំណែកទំនាក់ទំនងទ្វេភាគី រវាងកាណាដា និងម៉ិកស៊ិក បានធ្លាក់ចុះកាលពីឆ្នាំមុន បន្ទាប់ពីអ្នកនយោបាយជាន់ខ្ពស់កាណាដា បានលើកឡើងថា ពួកគេនឹងល្អប្រសើរជាង ក្នុងការចរចាកិច្ចព្រមព្រៀងពាណិជ្ជកម្មតែឯងជាមួយរដ្ឋបាលរបស់លោក Trump៕