សារព័ត៌មានដ៏ល្បី Al Jazeeraរបស់ប្រទេសកាតាបានសរសេរថា កងកម្លាំងថៃបានបាញ់គ្រាប់ជ័រ និងឧស្ម័នបង្ហូរទឹកភ្នែកក្នុងការប៉ះទង្គិចជាមួយអ្នកភូមិកម្ពុជា។

ជនស៊ីវិលកម្ពុជា២៩នាក់ រួមទាំងព្រះសង្ឃនិងមន្ត្រីផងបានរងរបួស នៅពេលយោធាថៃបានប្រើឧស្ម័នបង្ហូរទឹកភ្នែក និងគ្រាប់កាំភ្លើងជ័រក្នុងអំឡុងពេលប៉ះទង្គិចគ្នានៅក្នុងតំបន់ជម្លោះមួយនៅព្រំដែនកម្ពុជា-ថៃកាលពីរសៀលថ្ងៃពុធសប្ដាហ៍នេះ ជាអំពើហិង្សាដ៏ធ្ងន់ធ្ងរបំផុតចាប់តាំងពីប្រទេសទាំងពីរបានបញ្ឈប់ការប្រយុទ្ធគ្នាឆ្លងព្រំដែនកាលពីខែកក្កដា។សារព័ត៌មាន Reutersរបស់អង់គ្លេសរាយការណ៍ថា កងកម្លាំងថៃបាញ់ឧស្ម័នបង្ហូរទឹកភ្នែក និងគ្រាប់កាំភ្លើងជ័រលើជនស៊ីវិលកម្ពុជាដែលគ្មានអាវុធនៅតំបន់ព្រំដែនមានជម្លោះកាលពីថ្ងៃពុធ ជាការកើនឡើងគួរឱ្យកត់សម្គាល់បំផុតចាប់តាំងពីបានប្រកាសបទឈប់បាញ់ដើម្បីបញ្ចប់ជម្លោះដ៏ធ្ងន់ធ្ងររយៈពេលប្រាំថ្ងៃកាលពីខែកក្កដា។ប្រព័ន្ធផ្សព្វផ្សាយបរទេសស្ទើរទូទាំងពិភពលោករាយការណ៍ពីការឈ្លានពានរបស់ថៃក្នុងទឹកដីកម្ពុជា    

សារព័ត៌មាន ABC NEWS របស់សហរដ្ឋអាមេរិក បាននិយាយថាកងកម្លាំងថៃបានប៉ះទង្គិចជាមួយក្រមអ្នកតវ៉ាជាជនស៊ីវិល មកពីកម្ពុជា កាលពីថ្ងៃពុធ ហើយទង្វើរបស់ថៃគំរាមកំហែងដល់កិច្ចព្រមព្រៀងបទឈប់បាញ់ដ៏ផុយស្រួយ ក្រោយការប៉ះទង្គិចគ្នា៥ថ្ងៃ។សារព័ត៌មានDWរបស់អាល្លឺម៉ង់ រាយការណ៍ថា លោកនាយករដ្ឋមន្ត្រីកម្ពុជា ហ៊ុន ម៉ាណែត បានចោទប្រកាន់ថៃកាលពីថ្ងៃព្រហស្បតិ៍សប្ដាហ៍នេះថា បានរារាំងជនស៊ីវិលមិនឲ្យត្រឡប់ទៅផ្ទះរបស់ពួកគេវិញនៅតាមព្រំដែនដែលមានជម្លោះរវាងប្រទេសទាំងពីរ ក្រោយថៃបានបាញ់ឧស្ម័នបង្ហូរទឹកភ្នែក និងសម្ភារៈបង្ក្រាបផ្សេងៗ ទៅលើអ្នកតវ៉ាកម្ពុជានៅក្នុងភូមិព្រំដែនមានជម្លោះ ហើយថៃនៅតែធ្វើសកម្មភាពព័ទ្ធយកដីអ្នកស្រុក ទោះមានការថ្កោលោទោសពីបរទេសក៏ដោយ។

សារព័ត៌មាន The Hindu របស់ឥណ្ឌា និយាយថា ទាហានថៃបានប្រើអំពើហិង្សាលើពលរដ្ឋ ព្រះសង្ឃនិងមន្ត្រីគ្មានអាវុធក្នុងដៃ ។មេដឹកនាំកម្ពុជា សម្ដេចនាយករដ្ឋមន្ត្រី ហ៊ុន ម៉ាណែត បានចោទប្រកាន់ប្រទេសថៃ ពីបទរារាំងមិនឲ្យពលរដ្ឋជាង ២០គ្រួសារ ត្រឡប់ទៅផ្ទះនៅព្រំដែនមានជម្លោះ នេះបើយោងតាមលិខិតរបស់លោកផ្ញើជូនប្រមុខអង្គការសហប្រជាជាតិ ចេញផ្សាយនៅថ្ងៃព្រហស្បតិ៍ ១៨ កញ្ញា ឆ្នាំ២០២៥ នេះ។

សារព័ត៌មាន AnewZ របស់អាស៊ែរបៃហ្សង់ និយាយថា នគរបាលថៃបានបាញ់ឧស្ម័នបង្ហូរទឹកភ្នែក គ្រាប់ជ័រ និងការរាយបន្លាលួសនៅតែបន្ត លើជនស៊ីវិលកម្ពុជានៅតំបន់ព្រំដែនជម្លោះមួយកាលពីថ្ងៃពុធ។ រដ្ឋមន្ត្រីក្រសួងព័ត៌មានកម្ពុជា លោក នេត្រ ភក្ត្រា បានចោទមន្ត្រីថៃពីបទទន្ទ្រានឆ្លងព្រំដែន ហើយបាននិយាយថា ពួកគេបានប្រើឧស្ម័នបង្ហូរទឹកភ្នែក គ្រាប់កាំភ្លើងជ័រ និងឧបករណ៍បង្កើតសំឡេងរំខានប្រឆាំងនឹងជនស៊ីវិលកម្ពុជា។សារព័ត៌មាន Asia news network មានមូលដ្ឋាននៅសិង្ហបុរីនិយាយថា គណៈកម្មាធិការសិទ្ធិមនុស្សកម្ពុជា (CHRC) បានថ្កោលទោសចំពោះការប្រើអំពើហិង្សារបស់កងកម្លាំងសន្តិសុខថៃលើជនស៊ីវិលកម្ពុជា ដោយប្រកាសថា ជាការរំលោភសិទ្ធិមនុស្សយ៉ាងធ្ងន់ធ្ងរ។ គណៈកម្មាធិការនេះអំពាវនាវឲ្យសហគមន៍អន្តរជាតិជួយអន្តរាគមន៍ និងដាក់សម្ពាធថៃឲ្យគោរពច្បាប់តំបន់ និងអន្តរជាតិ៕