ហ្វូងមនុស្សរាប់សែននាក់បានចេញដើរដង្ហែតវ៉ានៅក្នុងបាតុកម្មតាមដងផ្លូវនៅទូទាំងប្រទេសបារាំង កាលពីថ្ងៃព្រហស្បតិ៍ (១៨ កញ្ញា) ខណៈសហជីពបានធ្វើសកម្មភាព "កូដកម្មមួយថ្ងៃ" ដើម្បីដាក់សម្ពាធលើនាយករដ្ឋមន្ត្រីបារាំងថ្មី គឺលោក Sébastien Lecornu ជំរុញឱ្យលោកគិតឡើងវិញពីការកាត់បន្ថយថវិកាជាតិ និងទាមទារប្រាក់ឈ្នួល សោធននិវត្តន៍ និងសេវាសាធារណៈកាន់តែប្រសើរ។

គ្រូបង្រៀន អ្នកបើកបររថភ្លើង ឱសថការី និងបុគ្គលិកមន្ទីរពេទ្យ ស្ថិតក្នុងចំណោមអ្នកធ្វើកូដកម្ម ជាផ្នែកនៃ "ការតវ៉ាមួយថ្ងៃ" ខណៈសិស្សវ័យជំទង់ក៏បាននាំគ្នាបិទវិទ្យាល័យអស់ជាច្រើនម៉ោង។ ជារួម ហ្វូងអ្នកតវ៉ាធ្វើបាតុកម្មជាង ២៥០កន្លែង ហើយដើរដង្ហែក្នុងទីក្រុងនានា ចាប់ពីប៉ារីស ទៅដល់ក្រុង Marseille, ក្រុង Nantes, ក្រុង Lyon និង Montpellier ជាដើម។ មានការប៉ះទង្គិចគ្នាមួយចំនួនក្នុងការប្រមូលផ្តុំតវ៉ានោះ ប៉ុន្តែកម្រិតនៃអំពើហិង្សាមិនខ្លាំងក្លាដូចដែលអាជ្ញាធរភ័យខ្លាចទេ។

ក្រុមអ្នកតវ៉ា និងសហជីពឈ្មោះ CGT បានអំពាវនាវឱ្យលុបចោលផែនការសារពើពន្ធរបស់រដ្ឋាភិបាលមុន ហើយចំណាយកាន់តែច្រើនលើសេវាសាធារណៈ យកពន្ធខ្ពស់ៗលើអ្នកមានទ្រព្យ និងទាមទារឱ្យបន្ទាបអាយុចូលនិវត្តន៍ដើម្បីឱ្យប្រជាជនអាចទទួលបានប្រាក់សោធនកាន់តែលឿន។ CGT និយាយថា មនុស្ស ១លាននាក់ បានចូលរួមក្នុងកូដកម្ម និងការតវ៉ា ប៉ុន្តែអាជ្ញាធរប៉ាន់ប្រមាណថាមានចំនួនអ្នកតវ៉ាប្រហែលពាក់កណ្តាលនៃចំនួនអះអាងនោះប៉ុណ្ណោះ។

កូដកម្ម និងការតវ៉ាដ៏តានតឹងនេះកើតឡើងស្របពេលវិបត្តិនយោបាយនៅបារាំង។ កាលពីសប្តាហ៍មុន លោកប្រធានាធិបតី Emmanuel Macron បានតែងតាំងសម្ព័ន្ធមិត្តជិតស្និទ្ធរបស់ខ្លួនគឺលោក Lecornu ឱ្យធ្វើជានាយករដ្ឋមន្ត្រីទី៣ ក្នុងពេលត្រឹមតែ ១ឆ្នាំ បន្ទាប់ពីអ្នកកាន់តំណែង ២រូបពីមុន គឺលោក François Bayrou និងលោក Michel Barnier ត្រូវបានសភាបណ្តេញចេញពីតំណែង ដោយសារការខ្វែងគំនិតគ្នាយ៉ាងជូរចត់ជុំវិញការកាត់បន្ថយថវិកាជាតិនេះ៕