អង្គការសហប្រជាជាតិ បាននិយាយកាលពីថ្ងៃពុធ (១៧ កញ្ញា) ថា បុគ្គលិកផ្តល់ជំនួយនៅតែបន្តប្រឹងប្រែងឥតសម្រាក និងខិតខំយ៉ាងសស្រាក់សស្រាំ ដើម្បីសម្អាតកម្ទេចថ្ម និងសាងសង់ឡើងវិញ បន្ទាប់ពីគ្រោះរញ្ជួយដីដ៏ធំបានវាយប្រហារភាគខាងកើតអាហ្វហ្គានីស្ថាន កាលពីចុងខែសីហាកន្លងទៅ ដោយបានសម្លាប់មនុស្សយ៉ាងតិច ២.២០០នាក់ និងកាត់ផ្តាច់ផ្លូវទៅតំបន់ដាច់ស្រយាលជាច្រើន។

រញ្ជួយដីកម្រិត ៦រ៉ិចទ័រ កាលពីថ្ងៃទី៣១ ខែសីហា ដែលប៉ះពាល់ដល់មនុស្សជាងកន្លះលាននាក់នោះ មានជម្រៅរាក់ប្រហែល ១០គីឡូម៉ែត្រ ដោយបានបំផ្លាញ ឬបង្កការខូចខាតយ៉ាងទូលំទូលាយដល់អគារទាបៗនៅតំបន់ភ្នំ។ រញ្ជួយដីនេះបានវាយប្រហារនៅពេលយប់ជ្រៅដែលធ្វើឱ្យមនុស្សស្លាប់ច្រើន ហើយផ្ទះសម្បែងក៏បាក់រលំភ្លាមៗ បង្កជាអន្ទាក់មរណៈកាន់តែអាក្រក់។

កម្មវិធីអភិវឌ្ឍរបស់អង្គការសហប្រជាជាតិ UNDP បាននិយាយថា ទិន្នន័យពីផ្កាយរណបបង្ហាញថា កម្ទេចកម្ទីដ៏ច្រើនក្នុងបរិមាណប្រហែលរថយន្តដឹកទំនិញ ៤០.៥០០គ្រឿង នៅតែត្រូវការសម្អាតពីតំបន់ដែលរងផលប៉ះពាល់នៅក្នុងខេត្តមួយចំនួន ហើយសហគមន៍ទាំងមូលនៅតែខ្ទេចខ្ទី ខណៈក្រុមគ្រួសារកំពុងស្នាក់នៅតាមទីវាលចំហ ជាមួយនឹងភាពភ័យខ្លាច និងកង្វះជំនួយ។

ចំណុចកណ្តាលនៃរញ្ជួយដីនេះគឺនៅក្នុងខេត្ត Kunar ដាច់ស្រយាល និងសម្បូរដីភ្នំ ដែលបង្កជាបញ្ហាខ្លាំងដល់កិច្ចប្រឹងប្រែងជួយសង្គ្រោះ និងសម្រាលបន្ទុកដោយរដ្ឋាភិបាលតាលីបង់ និងក្រុមមនុស្សធម៌៕