ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (១៨ កញ្ញា) បានបង្ហើបប្រាប់ឱ្យនាយករដ្ឋមន្ត្រីអង់គ្លេស លោក Keir Starmer អាចប្រើប្រាស់យោធាដើម្បីបញ្ឈប់ការធ្វើអន្តោប្រវេសន៍ខុសច្បាប់ នៅក្នុងសន្និសីទសារព័ត៌មានមួយដើម្បីបិទបញ្ចប់ដំណើរទស្សនកិច្ចផ្លូវរដ្ឋលើកទីពីររបស់លោក ទៅកាន់ចក្រភពអង់គ្លេស។

ក្នុងពិភាក្សាពីបញ្ហាអន្តោប្រវេសន៍ជាមួយលោក Starmer លោក Trump បានលើកឡើងពីគោលនយោបាយរបស់លោកក្នុងការធានាព្រំដែននៅសហរដ្ឋអាមេរិក ហើយសង្កត់ធ្ងន់ថា ចក្រភពអង់គ្លេសបានប្រឈមមុខនឹងបញ្ហាស្រដៀងគ្នានេះជាមួយនឹងជនអន្តោប្រវេសន៍ជិះទូកតូចៗឆ្លងកាត់យ៉ាងលើសលប់តាមផ្លូវទឹកអង់គ្លេស។

លោក Trump បាននិយាយថា "មានអ្នកចូលទៅចក្រភពអង់គ្លេសច្រើនណាស់ ហើយលោកបានប្រាប់នាយករដ្ឋមន្រ្តីអង់គ្លេសឱ្យបញ្ឈប់រឿងនេះ ទោះជាត្រូវកោះហៅយោធា ឬតាមមធ្យោបាយណាក៏ដោយ"។ ក្រោយមកទៀត ក្នុងបទសម្ភាសន៍ជាមួយទូរទស្សន៍ Fox News លោកក៏បានជំរុញឱ្យលោក Starmer ប្រកាន់ជំហរតឹងរឹងប្រឆាំងនឹងអន្តោប្រវេសន៍។

គួរឱ្យដឹងថា ចាប់តាំងពីការវិលត្រឡប់ទៅតំណែងសេតវិមានវិញក្នុងខែមករា លោក Trump បានបង្កើនការនិរទេសជនអន្តោប្រវេសន៍ខុសច្បាប់ និងបង្ក្រាបការឆ្លងកាត់ព្រំដែនខុសច្បាប់យ៉ាងលើសលប់៕