ក្រុមមនុស្សធម៌របស់អង្គការសហប្រជាជាតិ កាលពីថ្ងៃព្រហស្បតិ៍ (១៨ កញ្ញា) បានព្រមានខ្លាំងៗថា ខ្សែជីវិតជនស៊ីវិលចុងក្រោយបង្អស់ដែលនៅសេសសល់ កំពុងដួលរលំទៅហើយនៅក្នុងទីក្រុងហ្កាហ្សា ខណៈការវាយលុកយោធារបស់អ៊ីស្រាអែល បង្កឱ្យមានអ្នកស្លាប់ និងរបួសកាន់តែច្រើនឡើង ការភៀសខ្លួនទ្រង់ទ្រាយធំ ការបំផ្លិចបំផ្លាញ និងការរឹតត្បិតកាន់តែខ្លាំងលើការងារមនុស្សធម៌។

ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បាននិយាយថា ក្នុងពេលត្រឹមតែ ៥ថ្ងៃចុងក្រោយនោះ ជម្រកសង្គ្រោះបន្ទាន់ ១១កន្លែង សម្រាប់មនុស្សប្រហែល ១១.០០០នាក់ នៅទីក្រុងហ្កាហ្សា បានរងការវាយប្រហារដោយផ្ទាល់ ឬប្រយោល។ ទីជម្រកទាំងនោះស្ថិតក្នុងបរិវេណរបស់ទីភ្នាក់ងារជំនួយ និងសម្រាលបន្ទុករបស់អង្គការសហប្រជាជាតិ សម្រាប់ជនភៀសខ្លួនប៉ាឡេស្ទីន នៅតំបន់ដើមបូព៌ា UNRWA។

OCHA និយាយថា ដៃគូរបស់ខ្លួនដែលតាមដានបម្លាស់ទីប្រជាជនប៉ាឡេស្ទីន បានរាយការណ៍ពីចំនួនកើនឡើងនៃជនភៀសខ្លួនក្នុងតំបន់ហ្កាហ្សាស្ទ្រីបទាំងមូល ដែលឥឡូវនេះមានលើសពី ១លាននាក់ហើយ ចាប់តាំងពីបទឈប់បាញ់បានដួលរលំនៅពាក់កណ្តាលខែមីនា។

គិតត្រឹមថ្ងៃពុធ ទី១៧ ខែកញ្ញា ជនភៀសខ្លួនជាង ២០ម៉ឺននាក់ ត្រូវបានកត់ត្រាពីភាគខាងជើងទៅភាគខាងត្បូងនៃតំបន់ហ្កាហ្សា ក្នុងពេល ១ខែកន្លងមកនេះ រួមទាំងចំនួន ៥៦.០០០នាក់ ចាប់តាំងពីថ្ងៃអាទិត្យ ទី១៤ ខែកញ្ញាមក៕