ស្នងការការពារជាតិអ៊ឺរ៉ុប លោក Andrius Kubilius បាននិយាយកាលពីថ្ងៃព្រហស្បតិ៍ (១៨ កញ្ញា) ថា លោកគ្រោងនឹងជួបពិភាក្សាជាមួយបណ្ដារដ្ឋមន្ត្រីការពារជាតិប្លុកអឺរ៉ុប នៅសប្តាហ៍ក្រោយនេះ ស្តីពីការសាងសង់ "ជញ្ជាំងដ្រូន" នៅតាមបណ្តោយព្រំដែនភាគខាងកើតរបស់សហភាពអឺរ៉ុប ដែលជាគម្រោងមួយត្រូវចាត់ទុកថាបន្ទាន់ខ្លាំង ក្រោយយានដ្រូនរុស្ស៊ី ជ្រៀតចូលដែនអាកាសប៉ូឡូញ។

លោក Kubilius បានប្រាប់សារព័ត៌មានរ៉យទ័រថា ប្រទេសសហភាពអឺរ៉ុបមួយចំនួនបានពិភាក្សាគ្នារួចទៅហើយពីគំនិតនៃខ្សែការពារប្រឆាំងនឹងដ្រូនបែបនេះ មុនពេលឧប្បត្តិហេតុជ្រៀតចូលដែនអាកាសកាលពីសប្តាហ៍មុន ហើយស្លាបប្រតិបត្តិរបស់សហភាពអឺរ៉ុប ឥឡូវនេះ ចង់ចាត់វិធានការឱ្យបានឆាប់ដើម្បីប្រែគំនិតនេះឱ្យក្លាយជាការពិត។

ក្រុមអ្នកវិភាគ និងមន្ត្រីបាននិយាយថា ការដែលដ្រូនចូលក្នុងដែនអាកាសប៉ូឡូញបាន បានលាតត្រដាងពីចន្លោះប្រហោងនៃសមត្ថភាពរបស់អឺរ៉ុប និងអង្គការណាតូ ក្នុងការការពារប្រឆាំងនឹងដ្រូន បើទោះបីជាកងកម្លាំងប៉ូឡូញ និងណាតូ បាញ់ទម្លាក់អាវុធអាកាសនោះជាច្រើនគ្រឿងក៏ដោយ។

លោក Kubilius បាននិយាយថា លោកនឹងធ្វើសន្និសីទវីដេអូស្តីពីគម្រោងនេះ ជាមួយរដ្ឋមន្ត្រីការពារជាតិអឺរ៉ុបខាងកើត និងតំណាងមកពីអ៊ុយក្រែន ដែលអាចចែករំលែកមេរៀនពីសង្គ្រាមជាមួយរុស្ស៊ី។ ប្រមុខការពារប្លុកអឺរ៉ុបរូបនេះបន្ថែមថា ការពិភាក្សានៅតែស្ថិតក្នុងដំណាក់កាលដំបូងនៅឡើយ ប៉ុន្តែលោកសង្កត់ធ្ងន់ថា គម្រោងនេះអាចជាឧបករណ៍ចាប់សញ្ញាចម្រុះ និងអាវុធផ្សេងៗគ្នា និងប្រព័ន្ធវាយប្រហារផ្នែកបច្ចេកវិទ្យា ដែលនឹងរកឃើញ និងបំផ្លាញដ្រូនដែលចូលពីខាងក្រៅ៕