លោកប្រធានាធិបតីអាមេរិក Donald Trump បាននិយាយនៅក្នុងបទសម្ភាសន៍មួយចាក់ផ្សាយលើកញ្ចក់ទូរទស្សន៍ Fox News នៅថ្ងៃព្រហស្បតិ៍ (១៨ កញ្ញា) ថា សហរដ្ឋអាមេរិក នឹងជួយធានាសន្តិភាព បន្ទាប់ពីសង្គ្រាមរបស់រុស្ស៊ី នៅអ៊ុយក្រែន ត្រូវបានដោះស្រាយរួចរាល់។

ក្នុងបទសម្ភាសន៍នោះ លោក Trump បានលើកឡើងថា "បន្ទាប់ពីសង្រ្គាមត្រូវបានដោះស្រាយអស់រួចរាល់ អាមេិរកនឹងជួយធានាសន្តិភាព ហើយនៅទីបំផុតរឿងនេះនឹងកើតឡើង"។ លោក Trump ក៏បានទទួលស្គាល់ដែរថា ការជួយបញ្ចប់សង្រ្គាមនៅអ៊ុយក្រែន មានការលំបាកជាងការរំពឹងទុកទៅទៀត ហើយថា លោកមានការខកចិត្តយ៉ាងខ្លាំងចំពោះប្រធានាធិបតីរុស្ស៊ី លោក Vladimir Putin ។

លោក Trump បានដាក់ពេលកំណត់ម្តងហើយម្តងទៀតសម្រាប់ទីក្រុងមូស្គូ ក្នុងការឈានដល់កិច្ចព្រមព្រៀងបទឈប់បាញ់ជាមួយអ៊ុយក្រែន បើពុំនោះសោតនឹងប្រឈមទណ្ឌកម្មធ្ងន់ធ្ងរ ប៉ុន្តែរុស្ស៊ីហាក់មិនអើពើឡើយ។ លោក Trump ក៏បានស្វាគមន៍យ៉ាងកក់ក្តៅចំពោះលោក Putin ក្នុងកិច្ចប្រជុំកំពូលសន្តិភាពនៅរដ្ឋអាឡាស្កា កាលពីពាក់កណ្តាលខែសីហា ប៉ុន្តែនៅតែមិនទទួលបានផ្លែផ្កាសំខាន់ៗអ្វីឡើយ។

ជាមួយគ្នានេះ លោក Trump បានប្រាប់ទូរទស្សន៍ Fox News ថា លោកនៅតែជឿជាក់ថានឹងមានដំណោះស្រាយចំពោះជម្លោះដ៏បង្ហូរឈាមនៅអ៊ុយក្រែន ហើយថា មធ្យោបាយមួយដើម្បីទៅដល់គោលដៅនោះគឺអឺរ៉ុប ត្រូវតែបញ្ឈប់ការទិញប្រេងពីរុស្ស៊ី៕