ក្រុមប្រឹក្សាសន្តិសុខអង្គការសហប្រជាជាតិ (UNSC) ត្រូវបានគេរំពឹងថា នឹងបោះឆ្នោតលើសេចក្ដីសម្រេច នៅថ្ងៃសុក្រ (ទី១៩ ខែកញ្ញា) នេះ ជុំវិញថា តើត្រូវដាក់ទណ្ឌកម្មឡើងវិញ លើប្រទេសអ៊ីរ៉ង់ដែរ ឬយ៉ាងណា ពាក់ព័ន្ធនឹងកម្មវិធីនុយក្លេអ៊ែររបស់ប្រទេសនេះ ខណៈដែលមន្ត្រីអឺរ៉ុបបានព្រមានទីក្រុងតេអេរ៉ង់ថា ពេលវេលាកំពុងអស់បណ្ដើរៗហើត ក្នុងការឈានដល់ដំណោះស្រាយការទូត នៅមុនកិច្ចប្រជុំប្រចាំឆ្នាំរបស់អង្គការសហប្រជាជាតិ (UN) នាសប្តាហ៍ក្រោយ។

សេចក្ដីសម្រេចបង្ហាញដោយកូរ៉េខាងត្បូង ដែលជាប្រធានបច្ចុប្បន្ននៃក្រុមប្រឹក្សាមានសមាជិក ១៥ប្រទេស នឹងតម្រូវឲ្យមានការបោះឆ្នោតគាំទ្រយ៉ាងតិច ៩សំឡេង ដើម្បីបញ្ឈប់ទណ្ឌកម្មកុំឲ្យចូលជាធរមាននៅដំណាច់ខែនេះ ដូចដែលបានគូសបញ្ជាក់ដោយកិច្ចព្រមព្រៀងនុយក្លេអ៊ែរឆ្នាំ២០១៥ របស់អ៊ីរ៉ង់ជាមួយមហាអំណាចពិភពលោក។

អ្នកការទូតបានចង្អុលបង្ហាញថា ទោះបីជាមានទស្សនៈខុសគ្នាក៏ដោយ ក៏មិនមានការគាំទ្រគ្រប់គ្រាន់ ដើម្បីបញ្ចៀសការដាក់ទណ្ឌកម្មទាំងអស់លើអ៊ីរ៉ង់ដោយគ្មានលក្ខខណ្ឌណាមួយឡើយ។

ប្រទេសបារាំង អាល្លឺម៉ង់ និងចក្រភពអង់គ្លេស បានមានចំណាត់ការកាលពីខែមុន ដើម្បីចាប់ផ្តើម «យន្តការស្វ័យប្រវត្តិ» ដែលដាក់ឡើងវិញដោយស្វ័យប្រវត្តិនូវទណ្ឌកម្មរបស់ UN ដែលចូលជាធរមាន មុនមានកិច្ចព្រមព្រៀងនុយក្លេអ៊ែរ។ ការដាក់ទណ្ឌកម្មទាំងនោះ រួមមានទណ្ឌកម្មលើអាវុធធម្មតា ការរឹតបន្តឹងលើការអភិវឌ្ឍមីស៊ីលបាលីស្ទិក ការបង្កកទ្រព្យសម្បត្តិ ការហាមឃាត់ធ្វើដំណើរ និងការដាក់បម្រាមលើការផលិតបច្ចេកវិទ្យាដែលទាក់ទងនឹងនុយក្លេអ៊ែរ។

ដំណើរការនេះត្រូវបានបង្កើតឡើង ដើម្បីជាការបញ្ជាក់ពីការមិនអាចវេតូបាន ប្រសិនបើស្ថាប័នដ៏មានឥទ្ធិពលបំផុតរបស់ UN មួយនេះ មិនយល់ព្រមបញ្ឈប់វាដោយផ្ទាល់ទេនោះ។ ក្នុងរយៈពេលប៉ុន្មានសប្តាហ៍ចុងក្រោយនេះ ទំនាក់ទំនងការទូតដែលកើនឡើងយ៉ាងខ្លាំង រវាងអ៊ីរ៉ង់ និងបណ្តាប្រទេសអឺរ៉ុប បានកើតមាន ប៉ុន្តែរហូតមកដល់ពេលនេះ គ្មានដំណោះស្រាយបានឈានដល់ ហើយការដាក់ទណ្ឌកម្ម ទំនងជាកើតមាន៕