តាខ្មៅ៖ ពិធីសែនចូលឆ្នាំចិន កាន់តែខិតជិតចូលមកដល់ក្រុមម៉ុងសាយ នៃសមាគមខ្មែរ-ចិន ខេត្តកណ្ដាល កំពុង​មមាញឹក​សម្រុក​ហ្វឹកហាត់​រៀងរាល់​ល្ងាច​កាន់តែច្រើន។ ​ការសម្រុកហាត់នេះ ក៏ព្រោះតែដោយសារ រយៈពេលហាត់មានពេលខ្លីត្រឹមប្រមាណ ១ខែកន្លះ ដែលរាល់ឆ្នាំ​មាន​ពេលហាត់រហូតដល់ប្រមាណ៣ខែ មុនចូលឆ្នាំចិន។

ការ​ហ្វឹកហាត់​សម្រាប់​ក្រុម​ម៉ុងសាយ ​មុននឹងការសម្ដែងក្នុងពិធីសែនចូលឆ្នាំ ​គឺជារឿងចាំបាច់។ នេះជាការលើកឡើងរបស់លោក ​ឌុល គោ ជាគ្រូបង្វឹកម៉ុងសាយសមាគមខ្មែរ-ចិនខេត្តកណ្ដាល។ សម្រាប់ក្រុមម៉ុងសាយ ​របស់លោក ខណៈនេះ គឺកំពុងសម្រុកហ្វឹកហាត់កាន់តែ​ខ្លាំងក្លា ព្រោះ​រយៈពេល​ហាត់ឆ្នាំនេះ ​មានត្រឹមប្រមាណ១ខែកន្លះ ​ដែលពេលវេលាត្រូវហាត់ជាធម្មតា គឺក្នុងរង្វង់ជាង៣ខែ។

ទោះមានពេលវេលាខ្លីជាងពេលធម្មតាយ៉ាងណាក្ដី ​គ្រូបង្វឹកអះអាងថា ក្រុមរបស់លោក​អាច​ធ្វើវា​បាន​ និង​មាន​សមត្ថភាព​គ្រប់គ្រាន់​សម្រាប់​ការ​ឡក​សម្ដែង ​ជូន​តាម​តម្រូវការរបស់ប្រជាពល​រដ្ឋខ្មែរ​កាត់សែចិនទាំងអស់។ សម្រាប់​ឆ្នាំនេះ ខណៈដែលកម្ពុជា​បាន​បើក​ប្រទេស​ឡើងវិញ​លើគ្រប់វិស័យ និង​ករណី​ឆ្លងមានការថយចុះ ​លោក​ក៏ទទួល​បានការ​អញ្ជើញ​ទៅ​សម្ដែង​នាំ​លាភនាំជ័យ ជា​ច្រើនផងដែរ។

ចំពោះក្រុមយុវជន ដែលចំណាយពេលជាច្រើនម៉ោង​សម្រាប់កាល់រហ្វឹកហាត់រៀងរាល់ល្ងាច លើក​ឡើងថា ការហ្វឹកហាត់ពុំមែនជារឿង​ងាយ​ស្រួលប៉ុន្មាននោះទេ ទោះបីពួកគាត់មាន​បទ​ពិសោធន៍​យ៉ាងណាក្ដី។ ពួកគាត់បញ្ជាក់ថា ​ការហាត់ដំបូងៗគឺមានភាពហត់ខ្លាំង ជាពិសេសភាពគ្រោះថ្នាក់​ដែលអាចកើតឡើង បើធ្វេសប្រហែស។

ជាជំនឿរបស់ប្រជាពលរដ្ឋខ្មែរកាត់ចិន គឺជឿថា ម៉ុងសាយ ​អាចបណ្ដេញភាព​ចង្រៃ​ឧបទ្រព​កម្ចាត់​ភាវៈអាក្រក់​ និងបណ្ដេញ​ព្រលឹង​បិសាច​ឱ្យចេញឆ្ងាយ និងនាំមកវិញនូវលាភសំណាង​ជូនដល់​ក្រុម​គ្រួសារ។

អត្ថន័យនៃការឡកម៉ុងសាយ ក៏ស្រដៀងទៅនឹងសម្ដែងរបាំត្រុដិរបស់ខ្មែរផងដែរ ព្រោះរបាំ​ត្រុដិរបស់ខ្មែរ តែងត្រូវបានសម្ដែងក្នុងកំឡុងពិធីបុណ្យ​ចូលឆ្នាំខ្មែរ ដើម្បីបណ្ដេញ​ឧបទ្រពចង្រៃ​ក្នុងឆ្នាំចាស់ ​និងនាំមក​នូវភាព​សម្បូរ​សប្បាយ​ សុភមង្គលសម្រាប់ឆ្នាំថ្មី៕

អត្ថបទ៖ គឹមហុក