ក្រុមប្រឹក្សាសន្តិសុខអង្គការសហប្រជាជាតិបានបោះឆ្នោតកាលពីថ្ងៃសុក្រ ទី១៩ ខែកញ្ញា ដើម្បីដាក់ទណ្ឌកម្មសេដ្ឋកិច្ចឡើងវិញលើប្រទេសអ៊ីរ៉ង់ជុំវិញកម្មវិធីនុយក្លេអ៊ែររបស់ប្រទេសនេះបន្ទាប់ពីសម្ពាធពីប្រទេសមហាអំណាចអឺរ៉ុបដោយធ្វើឲ្យមានការឆ្លើយតបយ៉ាងខឹងសម្បារពីទីក្រុងតេអេរ៉ង់។

អង់គ្លេស បារាំង និងអាល្លឺម៉ង់ គឺជាប្រទេសហត្ថលេខីនៃផែនការសកម្មភាពគ្រប់ជ្រុងជ្រោយរួមឆ្នាំ២០១៥ ដែលមានបំណងរារាំងទីក្រុងតេអេរ៉ង់ពីការទទួលបានអាវុធនុយក្លេអ៊ែរ។ រដ្ឋាភិបាលប្រទេសទាំងបីនិយាយថា អ៊ីរ៉ង់បានបំពានលើការប្តេជ្ញាចិត្តរបស់ខ្លួនក្រោមកិច្ចព្រមព្រៀងនេះ។

លោកស្រី Barbara Woodward ឯកអគ្គរដ្ឋទូតចក្រភពអង់គ្លេសប្រចាំអង្គការសហប្រជាជាតិបាននិយាយថា «យើងទទូចឱ្យប្រទេសអ៊ីរ៉ង់មានចំណាត់ការនៅពេលនេះ» ខណៈលោកស្រីបានបោះឆ្នោតប្រឆាំងសេចក្តីសម្រេចដែលថានឹងបន្ថែមពេលការផ្អាកទណ្ឌកម្ម។ លោកស្រីនិយាយថា ទ្វារនៅតែបើកចំហចំពោះផ្នែកការទូតនៅក្នុងមហាសន្និបាតអង្គការសហប្រជាជាតិនៅទីក្រុងញូវយ៉ក សប្តាហ៍ក្រោយ។បេសកជនរបស់អ៊ីរ៉ង់ប្រចាំអង្គការសហប្រជាជាតិ លោក Amir Saeid Iravani បានថ្កោលទោសចំណាត់ការនេះថាជា «នយោបាយបង្ខិតបង្ខំ»។ លោកបាននិយាយទៅកាន់ក្រុមប្រឹក្សាថា «ចំណាត់ការថ្ងៃនេះ ឆាប់រហ័សពេក មិនចាំបាច់ និងខុសច្បាប់។ អ៊ីរ៉ង់ ទទួលស្គាល់ថាពុំមានកាតព្វកិច្ចដើម្បីអនុវត្តនោះទេ»។ រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយកាលពីពេលមុនថា លោកបានស្នើផែនការ «យុត្តិធម៌ និងមានតុល្យភាព» ដល់ប្រទេសមហាអំណាចអឺរ៉ុប ដើម្បីទប់ស្កាត់ការដាក់ទណ្ឌកម្មសេដ្ឋកិច្ចជាថ្មី។ ប្រធានាធិបតីបារាំងលោក Emmanuel Macron បាននិយាយនៅក្នុងបទសម្ភាសន៍តាមទូរទស្សន៍អ៊ីស្រាអែលនៅមុនពេលបោះឆ្នោតថា លោករំពឹងថាទណ្ឌកម្មនឹងត្រូវបានដាក់ឡើងវិញនៅចុងខែនេះ។