ប្រធានាធិបតីអាមេរិកលោក Donald Trump នឹងថ្លែងសុន្ទរកថាទៅកាន់មហាសន្និបាតអង្គការសហប្រជាជាតិ (UN) នៅថ្ងៃអង្គារ (ទី២៣ ខែកញ្ញា) នេះ ខណៈដែលបណ្ដាមេដឹកនាំពិភពលោក កំពុងដោះស្រាយវិបត្តិនានា រាប់ចាប់ពីតំបន់ហ្កាហ្សា រហូតដល់អ៊ុយក្រែន ហើយមន្ទិលសង្ស័យ ដែលថា តើសហរដ្ឋអាមេរិក ដោយមានគោលនយោបាយការបរទេស «អាមេរិកទី១» នៅតែត្រៀមខ្លួ នដើម្បីដើរតួនាទីជាអ្នកដឹកនាំ ក្នុងកិច្ចការពិភពលោកដែរ ឬយ៉ាងណា។

ចាប់តាំងពីចូលកាន់តំណែង ក្នុងខែមករាមក លោក Trump បានគាំទ្រគោលនយោបាយការបរទេសរបស់សហរដ្ឋអាមេរិក ដោយកាត់បន្ថយជំនួយបរទេស ការដាក់ពន្ធលើសម្ព័ន្ធមិត្ត និងសត្រូវដូចគ្នា ហើយសាងទំនាក់ទំនងជាមួយរុស្ស៊ី តែមានការប្រែប្រួលមិនទៀង។ ទន្ទឹមនឹងនោះ លោកបានស្វែងរក រហូតមកដល់ពេលនេះ ដោយមានភាពជោគជ័យតិចតួចប៉ុណ្ណោះ ដើម្បីដោះស្រាយជម្លោះតានតឹងមួយចំនួនរបស់ពិភពលោក។

ប្រមុខរដ្ឋ ឬរដ្ឋាភិបាលប្រមាណជា ១៥០រូប ត្រូវបានគេរំពឹងថា នឹងថ្លែងទៅកាន់ស្ថាប័នអន្តរជាតិនេះ ក្នុងសប្តាហ៍នេះ រួមទាំងលោក Trump ផងដែរ ជាវាគ្មិនគ្រោងទុកទី២ បន្ទាប់ពីសម័យប្រជុំបានបើកនៅម៉ោង ៩ព្រឹក ម៉ោងក្នុងស្រុក (ត្រូវនឹងម៉ោង ១៣ ម៉ោងសកល)។

លោក Trump នឹងឡើងថ្លែងជាលើកដំបូង ក្នុងរយៈពេល ៨ខែ នៅក្នុងអាណត្តិទី២ ដែលត្រូវបានសម្គាល់ដោយការកាត់ជំនួយធ្ងន់ធ្ងរ ជាចំណាត់ដែលបានបង្កឲ្យមានក្ដីបារម្ភផ្នែកមនុស្សធម៌ និងបានថ្វើឲ្យមានភាពមិនច្បាស់លាស់អំពីអនាគតរបស់ UN ដែលជំរុញឲ្យអគ្គលេខាធិការ UN លោក Antonio Guterres ព្យាយាមកាត់បន្ថយការចំណាយ និងលើកកម្ពស់ប្រសិទ្ធភាព។ មន្ត្រីសេតវិមានមិនទាន់បង្ហាញនូវសេចក្ដីលម្អិត អំពីអ្វីដែលលោក Trump នឹងនិយាយនោះឡើយ៕