មន្ត្រីសេតវិមាន បាននិយាយកាលពីថ្ងៃចន្ទ (ទី២២ ខែកញ្ញា)ថា ប្រធានាធិបតីអាមេរិក លោក Donald Trump នៅសប្តាហ៍នេះ នឹងប្រកាសថា កិច្ចព្រមព្រៀង ដើម្បីលក់ប្រតិបត្តិការរបស់បណ្ដាញសង្គម TikTok នៅសហរដ្ឋអាមេរិក ពីម្ចាស់ចិន គឺក្រុមហ៊ុន ByteDance នឹងបំពេញតាមការតម្រូវដែលមានចែងក្នុងច្បាប់ឆ្នាំ២០២៤ ដោយបន្ថែមថា វិនិយោគិននឹងមានរួមបញ្ចូលក្រុមហ៊ុន Oracle និងក្រុមហ៊ុនមូលធនឯកជន Silver Lake ផងដែរ។

មន្ត្រីរូបនោះបានបញ្ជាក់ថា ក្រុមហ៊ុន ByteDance នឹងមានភាគហ៊ុនតិចជាង ២០ភាគរយ ខណៈដែលបណ្ដាញសង្គម TikTok នឹងត្រូវបានគ្រប់គ្រងដោយការរួមបញ្ចូលគ្នានៃក្រុមហ៊ុនអាមេរិក និងសកលលោកដែលមានស្រាប់ ក៏ដូចជាចំនួនអ្នកវិនិយោគថ្មីជាច្រើនដែលមិនមានទំនាក់ទំនងជាមួយ ByteDance។

មន្ត្រីរូបនេះបានបន្ថែមទៀតថា «វានឹងក្លាយជាឈ្មោះគ្រួសារពិតប្រាកដ» ដោយនិយាយថា លោក Trump នឹងចុះហត្ថលេខាលើក្រឹត្យដែលបញ្ជាក់ថា កិច្ចព្រមព្រៀងនេះ គឺស្របច្បាប់តាមច្បាប់កំណត់។

កិច្ចព្រមព្រៀងនេះតម្រូវឲ្យទិន្នន័យទាំងអស់របស់អ្នកប្រើប្រាស់អាមេរិក នឹងត្រូវបានរក្សាទុកនៅលើហេដ្ឋារចនាសម្ព័ន្ធកុំព្យូទ័រក្លោដរបស់សហរដ្ឋអាមេរិកដែលដំណើរការដោយក្រុមហ៊ុន Oracle។

គួរជ្រាបថា លោក Trump បាននិយាយកាលពីថ្ងៃទី២១ ខែកញ្ញាថា មហាសេដ្ឋីប្រព័ន្ធផ្សព្វផ្សាយ លោក Lachlan Murdoch និងមេអាជីវកម្ម លោក Larry Ellison និងលោក Michael Dell នឹងចូលរួមជាអ្នកវិនិយោគអាមេរិក នៅក្នុងកិច្ចព្រមព្រៀងដែលត្រូវបានស្នើឡើង ដើម្បីបន្តប្រតិបត្តិការរបស់បណ្ដាញសង្គម TikTok នៅសហរដ្ឋអាមេរិក៕