នាយករដ្ឋមន្ត្រីអូស្ត្រាលីលោក Anthony Albanese បានលើកឡើងពីបុគ្គលិក​ជំនួយអូស្ត្រាលីម្នាក់ដែលត្រូវបានសម្លាប់ នៅតំបន់ហ្កាហ្សា រួមជាមួយនឹងអ្នកសារព័ត៌មាន និង «ជនស៊ីវិលរាប់ម៉ឺននាក់» នៅក្នុងសុន្ទរកថា នៅអង្គការសហប្រជាជាតិ (UN) ជាទីដែលមេដឹកនាំរាប់សិបនាក់ បានជួបប្រជុំគ្នា កាលពីថ្ងៃចន្ទ (ទី២២ ខែកញ្ញា) ដើម្បីលើកកម្ពស់ភាពជារដ្ឋប៉ាឡេស្ទីន។

អូស្ត្រាលី អង់គ្លេស និងកាណាដា កាលពីថ្ងៃអាទិត្យ បានទទួលស្គាល់ប៉ាឡេស្ទីន ដោយបានចូលរួមច្រើនជាង ១ភាគ៤នៃសមាជិករបស់ UN ចំនួន ១៩៣ប្រទេស ដែលទទួលស្គាល់រដ្ឋប៉ាឡេស្ទីនរួចហើយ ជាចំណាត់ការដែលត្រូវបានប្រឆាំងដោយសហរដ្ឋអាមេរិក និងអ៊ីស្រាអែល។

លោក Albanese បានប្រាប់កិច្ចប្រជុំថា អូស្ត្រាលីគឺជាសមាជិកដំបូងគេរបស់ UN ដែលបានបោះឆ្នោតកាលពី ៧៨ឆ្នាំមុន សម្រាប់ផែនការដែលធ្វើឲ្យភាពជារដ្ឋរបស់អ៊ីស្រាអែលអាចសម្រេចទៅបាន ហើយបន្តឈរជាមួយប្រជាជនជ្វីហ្វប្រឆាំងនឹងការប្រឆាំងនឹងជនជ្វីហ្វ។

លោកបាននិយាយថា «រដ្ឋាភិបាលអ៊ីស្រាអែលត្រូវតែទទួលយកចំណែកនៃការទទួលខុសត្រូវរបស់ខ្លួន» សម្រាប់វិបត្តិមនុស្សធម៌ នៅតំបន់ហ្កាហ្សា ជាកន្លែងដែលជនស៊ីវិលរាប់ម៉ឺននាក់ត្រូវបានសម្លាប់។

លោកបានលើកឡើងថា៖ «បុគ្គលិកជំនួយត្រូវបានសម្លាប់ដោយព្យាយាមផ្តល់ជំនួយមនុស្សធម៌ ដែលរួមមានទាំងជនជាតិអូស្ត្រាលីឈ្មោះ Zomi Frankcom ដែរ»។ ហើយលោកបានកត់សម្គាល់ផងដែរថា អ្នកសារព័ត៌មាន «ត្រូវបានសម្លាប់ដោយព្យាយាមនាំយកការពិតមកបំភ្លឺ»។

លោកបានបន្ថែមថា រដ្ឋាភិបាលគណបក្សការងាររបស់ Albanese បានសម្រេចទទួលស្គាល់ប៉ាឡេស្ទីនដោយផ្អែកលើការប្តេជ្ញាចិត្តរបស់អាជ្ញាធរប៉ាឡេស្ទីន ដែលថា ក្រុមហាម៉ាសដាក់អាវុធ និងគ្មានតួនាទីនៅក្នុងរដ្ឋនាពេលអនាគត ហើយការបោះឆ្នោតត្រូវបានរៀបចំឡើង៕