កងកម្លាំងអ៊ីស្រាអែលបានសម្លាប់ពលរដ្ឋប៉ាឡេស្ទីនយ៉ាងហោចណាស់៣៦នាក់កាលពីថ្ងៃអង្គារ ខណៈកងកម្លាំងបានវាយលុកនៅតំបន់ហ្កាហ្សាពីលើអាកាសនិងដីគោក ក្នុងពេលមេដឹកនាំពិភពលោកនៅឯមហាសន្និបាតអង្គការសហប្រជាជាតិ (UNGA) ក្នុងទីក្រុងញូវយ៉កទាមទារឱ្យបញ្ចប់សង្រ្គាមរយៈពេលពីរឆ្នាំមកនេះ។

អគារលំនៅឋាននៅតែត្រូវបានបំផ្លាញខណៈអ៊ីស្រាអែលបន្តរុលទៅមុខជាមួយផែនការរបស់ខ្លួនក្នុងការដណ្តើមយកទីក្រុងធំបំផុតនៃតំបន់ហ៊ុមព័ទ្ធមួយនេះ។ រូបភាពពីផ្កាយរណបដែលត្រូវបានវិភាគដោយ សារព័ត៌មាន Al Jazeera បង្ហាញពីយានយន្តរបស់កងទ័ពអ៊ីស្រាអែល បានស្ថិតនៅជុំវិញទីក្រុងហ្កាហ្សាមកពីទិសដៅជាច្រើន។

វីដេអូ ដែលត្រូវបានផ្ទៀងផ្ទាត់ដោយសារព័ត៌មាន Al Jazeera បង្ហាញពីរថក្រោះកំពុងរុលចូលទៅក្នុងសង្កាត់ Nassr មានចម្ងាយប្រហែលមួយគីឡូម៉ែត្រពីមន្ទីរពេទ្យ al-Shifa ។ ការបំផ្លិចបំផ្លាញនេះ បង្កើតបានជាផ្នែកនៃគំរូមួយដែលគណៈកម្មការអង្គការសហប្រជាជាតិនិយាយថាគឺជាអំពើប្រល័យពូជសាសន៍។ ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) កាលពីថ្ងៃអង្គារបានព្រមានថា ៀសកម្មភាពយោធារបស់អ៊ីស្រាអែលកំពុង «បង្កភាពភ័យខ្លាចដល់ប្រជាជនប៉ាឡេស្ទីននៅទីក្រុងហ្កាហ្សា និងបង្ខំឱ្យមនុស្សរាប់ម៉ឺននាក់ភៀសខ្លួនចេញ»។ ការរងទុក្ខរបស់ពលរដ្ឋប៉ាឡេស្ទីនបានធ្វើឲ្យមានការចាប់អារម្មណ៍ពីមេដឹកនាំពិភពលោកដែលបានប្រើប្រាស់វេទិកាមហាសន្និបាតអង្គការសហប្រជាជាតិ (UNGA) ដើម្បីទាមទារបទឈប់បាញ់នៅតំបន់ហ្កាហ្សា។ ថ្លែងទៅកាន់មហាសន្និបាត ប្រធានាធិបតីអាមេរិក លោក Donald Trump បាននិយាយថា សង្រ្គាម នៅហ្កហ្សា នឹងត្រូវបញ្ឈប់ «ភ្លាមៗ» ប៉ុន្តែបានច្រានចោលការទទួលស្គាល់រដ្ឋប៉ាឡេស្ទីនធ្វើឡើងដោយបណ្តាប្រទេសលោកខាងលិចមួយចំនួន ដោយចាត់ទុកថាជា «ការផ្តល់រង្វាន់» ដល់ក្រុមហាម៉ាស។ ប្រធានាធិបតីសហរដ្ឋអាមេរិក បានជួបមេដឹកនាំមកពីប្រទេសអារ៉ាប៊ីសាអ៊ូឌីត កាតា អារ៉ាប់រួម អេហ្ស៊ីប ហ្ស៊កដានី ទួរគី ឥណ្ឌូនេស៊ី និងប៉ាគីស្ថាននៅខាងក្រៅមហាសន្និបាតអង្គការសហប្រជាជាតិ (UNGA) ។