ក្រុមមនុស្សធម៌របស់អង្គការសហប្រជាជាតិ កាលពីថ្ងៃចន្ទ (២២ កញ្ញា) បានរាយការណ៍ពីការធ្លាក់ចុះយ៉ាងខ្លាំងក្នុងស្ថានភាពមនុស្សធម៌ និងកំណើនហិង្សានៅទីក្រុង El Fasher រដ្ឋធានីនៃតំបន់ North Darfur ប្រទេសស៊ូដង់ ខណៈដែលអង្គការសហប្រជាជាតិ និងដៃគូរបស់ខ្លួនកំពុងប្រឹងប្រែងទប់ទល់ការរីករាលដាលនៃជំងឺអាសន្នរោគនៅទូទាំងតំបន់ភាគខាងលិច Darfur ។

ទោះមានអសន្តិសុខក្ដី ក៏យុទ្ធនាការចាក់វ៉ាក់សាំងជំងឺអាសន្នរោគដែលគាំទ្រដោយអង្គការសហប្រជាជាតិ និងដៃគូ បានចាប់ផ្តើមទូទាំងភាគខាងលិចទីក្រុង Darfur ហើយយុទ្ធនាការនេះមានបំណងចាក់វ៉ាក់សាំងដល់មនុស្ស ១,៩លាននាក់។ ការិយាល័យអង្គការសហប្រជាជាតិ សម្រាប់ការសម្របសម្រួលកិច្ចការមនុស្សធម៌ (OCHA) និយាយថា មានករណីសង្ស័យអាសន្នរោគជាង ៥.២០០នាក់ នៅរដ្ឋ South Darfur ហើយមនុស្សជាង ២៥០នាក់ ត្រូវរាយការណ៍ថាបានស្លាប់ ចាប់តាំងពីខែឧសភាមក។

លើសពីនេះ ការិយាល័យ OCHA បាននិយាយថា "ការវាយប្រហារដ៏បង្ហូរឈាម និងការជម្លៀសថ្មី បានធ្វើឱ្យការឈឺចាប់របស់ជនស៊ីវិលបន្តឥតស្រាកស្រាន្ត។ ហិង្សានៅតែជះផលប៉ះពាល់យ៉ាងធ្ងន់ធ្ងរដល់កិច្ចប្រឹងប្រែងឆ្លើយតបមនុស្សធម៌"។

អង្គការទេសន្តរប្រវេសន៍អន្តរជាតិ IOM និយាយថា មនុស្សប្រហែល ៧.៥០០នាក់ បានរត់ភៀសខ្លួនចន្លោះនៅថ្ងៃព្រហស្បតិ៍ និងថ្ងៃសុក្រសប្ដាហ៍មុន ចេញពីជំរំ Abu Shouk នៅជាយក្រុង El Fasher និងផ្នែកខ្លះនៃទីក្រុងនេះ ស្របពេលអសន្តិសុខកើនឡើង។ លោក Tom Fletcher ប្រធានជំនួយសង្គ្រោះបន្ទាន់ របស់អង្គការសហប្រជាជាតិ បានព្រមានកាលពីចុងសប្តាហ៍មុនថា ក្រុង El Fasher ជិតដល់មាត់ជ្រោះហើយ ដោយជនស៊ីវិលកំពុងរស់នៅក្នុងស្ថានភាពទុរ្ភិក្ស៕