ប្រទេសសចិន នៅថ្ងៃអង្គារ (២៣ កញ្ញា) បានច្រានចោលសេចក្តីថ្លែងការណ៍រួមមួយ ដែលចេញដោយកូរ៉េខាងត្បូង ជប៉ុន និងអាមេរិក ដែលលើកឡើងដោយ "គ្មានភាពទទួលខុសត្រូវ" លើបញ្ហាទាក់ទងនឹងតំបន់តៃវ៉ាន់ និងសមុទ្រចិនខាងត្បូង ដោយជំរុញឱ្យប្រទេសពាក់ព័ន្ធទាំងឡាយគោរពគោលនយោបាយចិនតែមួយ និងបញ្ឈប់កំណើនភាពតានតឹង។

សេចក្តីថ្លែងការណ៍របស់ទីក្រុងប៉េកាំងនេះ បានចេញផ្សាយបន្ទាប់ពីកិច្ចប្រជុំមួយក្នុងចំណោមរដ្ឋមន្ត្រីការបរទេសកូរ៉េខាងត្បូង ជប៉ុន និងសហរដ្ឋអាមេរិក នៅទីក្រុងញូវយ៉ក ដែលបានលើកឡើងពី "សកម្មភាពអស្ថិរភាពកាន់តែខ្លាំងឡើងនៅជុំវិញកោះតៃវ៉ាន់" និង "ការអះអាងសិទ្ធិដែនសមុទ្រខុសច្បាប់" នៅក្នុងសមុទ្រចិនខាងត្បូង និង "ការប៉ុនប៉ងដើម្បីអនុវត្តការទាមទារបែបនេះ"។

អ្នកនាំពាក្យក្រសួងការបរទេសចិន លោក Guo Jiakun បានប្រាប់សន្និសីទសារព័ត៌មានប្រចាំថ្ងៃថា "ប្រទេសចិនមានការខកចិត្តយ៉ាងខ្លាំង និងច្រានចោលយ៉ាងម៉ឺងម៉ាត់បំផុតនូវសេចក្តីថ្លែងការណ៍បែបជ្រៀតជ្រែកចូលកិច្ចការផ្ទៃក្នុងរបស់ចិន និងធ្វើឱ្យប៉ះពាល់ដល់ចិន"។ លោក Guo បានសង្កត់ធ្ងន់ថា ការគំរាមកំហែងដ៏ធំបំផុតចំពោះសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ គឺមកពីសកម្មភាពផ្តាច់ខ្លួនរបស់កងកម្លាំង "ឯករាជ្យកោះតៃវ៉ាន់" និងការឃុបឃិត និងគាំទ្រពីខាងក្រៅ។

អ្នកនាំពាក្យក្រសួងការបរទេសចិនរូបនេះបានជំរុញប្រទេសពាក់ព័ន្ធ ឱ្យបញ្ឈប់ការផ្តល់ជំនួយ និងបញ្ឈប់សកម្មភាពផ្តាច់ខ្លួន "ឯករាជ្យតៃវ៉ាន់" ក្នុងគ្រប់រូបភាព និងចៀសវាងការបញ្ជូនសញ្ញាខុសណាមួយដល់កងកម្លាំងផ្តាច់ខ្លួនតៃវ៉ាន់។ ថ្លែងពីបញ្ហាសមុទ្រចិនខាងត្បូង លោក Guo បានបញ្ជាក់ថា ចិន នឹងការពារយ៉ាងខ្ជាប់ខ្ជួននូវអធិបតេយ្យភាពទឹកដី និងសិទ្ធិ និងផលប្រយោជន៍ដែនសមុទ្ររបស់ខ្លួន៕