យេម៉ែន៖ មន្ត្រីយេម៉ែននៅរដ្ឋធានីសាណាកំពុងប្រកាសអាសន្នអំពីវិបត្តិសុខភាព ខណៈមន្ទីរពេទ្យប្រឈមទៅនឹងការខ្វះខាតប្រេងឥន្ធនៈដើម្បីបន្តដំណើរការ។ វេជ្ជបណ្ឌិត Abd al-Rahman Rumayma គ្រូពេទ្យទារកនៅមន្ទីរពេទ្យ Al-Sabeen ក្នុងទីក្រុងសាណានិយាយថា ការខ្វះខាតប្រេងឥន្ធនៈនឹងបណ្តាលឱ្យមានការដាច់ចរន្តអគ្គិសនី ហើយនេះនឹងបង្អាក់ការងាររបស់គ្រូពេទ្យបង្កើតទារកនៅក្នុងមន្ទីពេទ្យកុមារ។
វេជ្ជបណ្ឌិតនិយាយថា វាក៏នឹងនាំទៅដល់ការផ្អាកប្រតិបត្តិការសង្គ្រោះបន្ទាន់ផងដែរ។ មន្ត្រីនៅក្នុងរដ្ឋាភិបាលក្រុមហួធីគាំទ្រដោយប្រទេសអ៊ីរ៉ង់ បានដាក់កំហុសលើក្រុមចម្រុះដឹកនាំដោយប្រទេសអារ៉ាប៊ីសាអូឌីត ដែលគ្រប់គ្រងដែនទឹករបស់ប្រទេសនេះពីបទប្លន់នាវាដឹកប្រេងដែលបង្កឱ្យមានវិបត្តិ។ លោក Essam Al-Mutawakel អ្នកនាំពាក្យក្រុមហ៊ុនប្រេងគ្រប់គ្រងដោយក្រុមហួធីនៅប្រទេសយេម៉ែនបាននិយាយថា គ្រប់វិស័យទាំងអស់ត្រូវបានគំរាមកំហែងជាមួយនឹងការបិទនៅថ្ងៃនេះ ជាពិសេសវិស័យសុខាភិបាល។ ក្រុមចម្រុះដឹកនាំដោយអារ៉ាប៊ីសាអូឌីតគ្រប់គ្រងដែនទឹករបស់ប្រទេសយេម៉ែន ហើយបាននឹងកំពុងរឹតបន្តឹងការដឹកជញ្ជូនទៅកាន់តំបន់ក្រោមការគ្រប់គ្រង របស់ក្រុមហួធីរបស់ប្រទេសរួមទាំងទីក្រុងសាណា។
ក្រុមចម្រុះទប់ស្កាត់រាល់ចរាចរណ៍ដើម្បីការពារក្រុមហ៊ូធី មិនឲ្យទទួលអាវុធពីអ្នកគាំទ្ររបស់ពួកគេគឺប្រទេសអ៊ីរ៉ង់។ ប្រទេសយេម៉ែនបានប្រឈមមុខទៅនឹងការខ្វះខាតប្រេងឥន្ធនៈ និងទំនិញមូលដ្ឋានដែលត្រូវបានដឹកជញ្ជូនដោយនាវា នៅទូទាំងតំបន់ជម្លោះរបស់ប្រទេស។ ជម្លោះរបស់ប្រទេសយេម៉ែនចាប់ផ្តើមដោយការដណ្តើមយករដ្ឋធានីកាលពីឆ្នាំ២០១៤ ដោយក្រុមឧទ្ទាមហួធីដែលគ្រប់គ្រងភាគច្រើននៅភាគខាងជើងប្រទេស។ ក្រុមនេះធ្វើសង្គ្រាមជាមួយរដ្ឋាភិបាលទទួលស្គាល់ដោយអន្តរជាតិ គាំទ្រដោយក្រុមចម្រុះដឹកនាំដោយប្រទេសអារ៉ាប៊ីសាអូឌីត និងសហរដ្ឋអាមេរិក៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
