ប្រធានផ្នែកមនុស្សធម៌របស់អង្គការសហប្រជាជាតិ បានចេញការព្រមានខ្លាំងៗជាថ្មីម្ដងទៀតកាលពីថ្ងៃពុធ (២៤ កញ្ញា) ថា នៅតំបន់ហ្កាហ្សា ដែលហែកហួរដោយសង្រ្គាម កុមារម្នាក់ត្រូវបានសម្លាប់ជាមធ្យមជារៀងរាល់មួយម៉ោងម្ដង ក្នុងរយៈពេលជិត ២ឆ្នាំមកនេះ ដោយធ្វើឱ្យក្មេងៗជនជាតិប៉ាឡេស្ទីនជាប់ខ្លួននៅក្នុងទីបញ្ចុះសព។

អគ្គលេខាធិការរងនៃអង្គការសហប្រជាជាតិ ទទួលបន្ទុកកិច្ចការមនុស្សធម៌ និងជាប្រធានសម្របសម្រួលជំនួយ លោក Tom Fletcher បាននិយាយថា កុមាររងការទម្លាក់គ្រាប់បែក ពិការភាព ភាពអត់ឃ្លាន ដុតសម្លាប់ទាំងរស់ កប់ក្នុងគំនរបាក់បែក ហើយត្រូវបង្ខំឱ្យឃ្លាតចេញពីឪពុកម្តាយពួកគេ។

លោកបាននិយាយថា៖ “នៅហ្កាហ្សា កុមារដែលមានសំណាង បានដេកក្នុងតង់ ខណៈអ្នកគ្មានសំណាងបានមើលឃើញទីជម្រករបស់ពួកគេត្រូវទម្លាក់គ្រាប់បែក ហើយសាលារៀនប្រែជាទីគួរឱ្យរន្ធត់ ដោយដកហូតសិទ្ធិទទួលបានការអប់រំរបស់កុមារជាង ៧សែននាក់"។ លោក Fletcher សង្កត់ធ្ងន់ថា ការឈឺចាប់របស់កុមារ មិននៅតែក្នុងតំបន់ហ្កាហ្សាទេ ប៉ុន្តែក៏មាននៅតំបន់កាន់កាប់ West Bank ផងដែរ ជាទីដែលកុមាររងអំពើហិង្សាយ៉ាងអាក្រក់។

ប្រធានកិច្ចការមនុស្សធម៌រូបនេះព្រមានថា ពិភពលោកដែលគ្មានច្បាប់ បានដកហូតសេចក្តីថ្លៃថ្នូរ និងក្តីសង្ឃឹមចេញពីកុមារអស់ហើយ។ ជាមួយគ្នានេះ ការិយាល័យអង្គការសហប្រជាជាតិ សម្រាប់ការសម្របសម្រួលកិច្ចការមនុស្សធម៌ (OCHA) និយាយថា ប្រតិបត្តិការយោធារបស់អ៊ីស្រាអែល បានបន្តទូទាំងតំបន់ហ្កាហ្សាស្ទ្រីប រួមទាំងក្នុងសង្កាត់មួយចំនួននៃទីក្រុងហ្កាហ្សាផងដែរ ជាទីដែលមានមនុស្សស្លាប់ និងរបួសរៀងរាល់ថ្ងៃ ហើយហេដ្ឋារចនាសម្ព័ន្ធត្រូវខ្ទេចខ្ទីក្រោមការទម្លាក់គ្រាប់បែកឥតឈប់ឈរ៕