ក្រសួងការបរទេសរុស្ស៊ី បាននិយាយថា រដ្ឋមន្ត្រីការបរទេសរុស្ស៊ី លោក Sergei Lavrov និងរដ្ឋមន្ត្រីការបរទេសអាមេរិក លោក Marco Rubio កាលពីថ្ងៃពុធ (២៤ កញ្ញា) បានអះអាងជាថ្មីនូវចំណាប់អារម្មណ៍រួមគ្នារបស់ភាគីទាំងពីរ ក្នុងការស្វែងរកដំណោះស្រាយដោយសន្តិវិធីចំពោះវិបត្តិអ៊ុយក្រែន ខណៈប្រមុខការទូតទាំងពីរទាំងពីរជួបប្រជុំគ្នានៅទីក្រុងញូវយ៉ក ខាងក្រៅសប្តាហ៍កម្រិតខ្ពស់នៃសម័យប្រជុំលើកទី៨០ នៃមហាសន្និបាតអង្គការសហប្រជាជាតិ UNGA។

លោក Lavrov បានរំលឹកឡើងវិញនូវការត្រៀមខ្លួនរបស់រុស្ស៊ី ក្នុងការប្រកាន់ខ្ជាប់នូវជំហរដែលគូសបញ្ជាក់ដោយមេដឹកនាំប្រទេសទាំងពីរក្នុងជំនួបនៅរដ្ឋអាឡាស្កា រួមទាំងការសម្របសម្រួលជាមួយទីក្រុងវ៉ាស៊ីនតោន លើការដោះស្រាយបញ្ហាឫសគល់នៃជម្លោះនៅអ៊ុយក្រែន។ លោកបានសម្តែងការប្រឆាំងទៅនឹងអ្វីដែលលោកពិពណ៌នាថាជាសំណើពីទីក្រុងគីវ និងអឺរ៉ុបមួយចំនួន ដែលអាចអូសបន្លាយវិបត្តិបន្ថែមទៀត។

សេចក្ដីសង្ខេបរបស់ក្រសួងការបរទេសអាមេរិក បាននិយាយថា លោក Rubio "បានរំលឹកឡើងវិញនូវការអំពាវនាវរបស់លោកប្រធានាធិបតី Donald Trump ឱ្យបញ្ឈប់ការកាប់សម្លាប់នេះ និងតម្រូវការសម្រាប់ឱ្យទីក្រុងមូស្គូ ចាត់វិធានការដ៏មានអត្ថន័យឆ្ពោះទៅរកដំណោះស្រាយយូរអង្វែងនៃសង្គ្រាមរុស្ស៊ី-អ៊ុយក្រែន"។

ក្រៅពីរឿងអ៊ុយក្រែន កិច្ចប្រជុំនេះក៏បានពិភាក្សាលើបញ្ហាទ្វេភាគីកាន់តែទូលំទូលាយ ដោយភាគីទាំងពីរបានសង្កត់ធ្ងន់លើសារៈសំខាន់នៃការស្តារទំនាក់ទំនងនយោបាយ និងសាធារណៈឡើងវិញ រួមទាំងតម្រូវការដើម្បីបន្តប្រតិបត្តិការជាប្រចាំនៃបេសកកម្មការទូតរវាងគ្នាផងដែរ៕