ខណៈតម្រូវការប្រើប្រាស់មានការកើនឡើងជាងមុន ប្រធានសមាគមអ្នកផលិតចំណីអាហារ​កម្ពុជា​ បានប្តេជ្ញាខិតខំផលិតផ្គត់ផ្គង់ចំណីអាហារប្រកបដោយគុណភាព ដើម្បីឆ្លើយតបឱ្យគ្រប់ និង​លើសតម្រូវការសំរាប់នាំចេញផងដែរ។

ឯកឧត្ដម មៀវ សុខទ្រី ប្រធានសមាគមអ្នកផលិតចំណីអាហាកម្ពុជា បាន​មាន​ប្រសាសន៍​ប្រាប់​ព័ត៌មាន ប៊ីធីវី ឱ្យដឹងនៅល្ងាចថ្ងៃទី២៤ ខែកញ្ញាថា គិតក្នុងរយៈពេល​ប៉ុន្មាន​ខែចុង​ក្រោយ​មក​នេះ​បាន​កត់​សម្គាល់​ឃើញ​ថា ផលិតផលខ្មែរជាច្រើនមុខទំនិញ គឺទទួលបានការគាំទ្រ​ជាខ្លាំ​ង​ពី​សំណាក់​ប្រជា​ពលរដ្ឋក្នុងស្រុក។

ឯកឧត្តម បានបន្តថា ផលិតករ ផលិតចំណីអាហារកម្ពុជា ពិតជាមានសេចក្តីត្រេកអរជាពន់ពេក និង​សូមថ្លែងនូវអំណរអរគុណជាអនេកកប្បការ ស្ថិតក្នុងកាលៈទេសៈ​មួយ​ដែល​បច្ចា​មិត្ត​មើល​ងាយ និងជាន់ឈ្លីដល់បូរណភាពទឹកដីរបស់កម្ពុជា ការបិទព្រំដែនជាឯកតោភាគីរបស់ថៃ ធ្វើឱ្យ​អាជីវករ​ផលិតចំណីអាហារឃើញយ៉ាងច្បាស់នូវការគាំទ្រពេញទំហឹងដល់ផលិតផលក្នុងស្រុក និង​ជា​ឱកាស់​ដ៏​ថ្លៃថ្លាក្នុងការបង្កើនលទ្ធភាពផលិត និងបន្ថែមការយក​ចិត្ត​ទុក​ដាក់​លើ​គុណភាព​ផង​ដែរ​។ ឯកឧត្តម បានបន្ថែមទៀតថា តម្រូវការកាន់តែកើនឡើង ទំហំផលិត​កាន់​តែ​ធំ​ថ្លៃ​ដើម​កាន់​តែអា​ច​កាត់ប​ន្ថយបាន ដូច្នេះជារយៈពេលខ្លីនិងមធ្យម សមាគមប្តេជ្ញាខិត​ខំ​ផលិត​ផ្គត់​ផ្គង់​ផលិត​ចំណី​អាហារ​ដល់ប្រជាពលរដ្ឋកម្ពុជា ឱ្យអស់ពីកំលាំងកាយចិត្ត និងប្រកបដោយគុណភាព ហើយ​ទៅ​អនាគត សមាគមក៏នឹងពង្រីកទំហំផលិតកម្មថែមទៀត ដើម្បីឆ្លើយតបឱ្យគ្រប់ និង​លើ​ស​តម្រូវ​ការ​ សំរាប់នាំចេញថែមទៀតផង។

កាលពីកន្លងទៅថ្មីៗនេះ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បាន​សរសេរ​ក្នុង​បណ្តាញ​សង្គម​ថា “ខ្ញុំគួរតែអរគុណថៃ ដែលតាមរយៈការបិទព្រំដែនជាឯកតោភាគីនេះ ទំនិញ​ថៃ​នាំ​ចូល​មិនបាន ធ្វើឲ្យទំនិញកម្ពុជាដែលផលិតក្នុងស្រុកមានការរីកចម្រើនយ៉ាងខ្លាំង។ ប្រជា​ជន​កម្ពុជា​ដែល​ស្រឡាញ់ជាតិនាំគ្នាគាំទ្រប្រើប្រាស់ទំនិញក្នុងស្រុក ដែលនេះ​នឹង​គាំទ្រ​ដល់​ការ​រីក​ចម្រើន​ខាង​សេដ្ឋកិច្ចសម្រាប់រយៈពេលវែង។ សម្តេចតេជោ បានថ្លែងបន្តថា សម្រាប់សំណូមពរ ជប៉ុន​ដែលវិនិយោគនៅថៃផងនៅកម្ពុជាផង ដែលត្រូវការដឹកទំនិញឆ្លងកាត់ព្រំដែនកម្ពុជា-ថៃ សូម​ជប៉ុនធ្វើទំនាក់ទំនងជាមួយភាគីថៃ ព្រោះភាគីកម្ពុជាបានផ្តល់ការយល់ព្រមរួចហើយ៕ អត្ថបទ៖ ឈិត បូរ៉ាវី