ទីក្រុងតេអេរ៉ង់ និងក្រុងវ៉ាស៊ីនតោន បានបង្ហាញសញ្ញាពីការបន្ធូរបន្ថយភាពតានតឹងនុយក្លេអ៊ែរដែលអាចធ្វើទៅបានកាលពីថ្ងៃពុធ ទី២៤ ខែកញ្ញា ដោយប្រទេសអ៊ីរ៉ង់បានទទូចថា ខ្លួនគ្មានមហិច្ឆតាក្នុងការផលិតអាវុធនុយក្លេអ៊ែរទេ ហើយសហរដ្ឋអាមេរិកបានបង្ហាញពីការត្រៀមខ្លួនដើម្បីបន្តកិច្ចចរចាឡើងវិញក្នុងគោលបំណងដោះស្រាយការប្រឈមមុខដាក់គ្នាជាយូរមកហើយ។

ប៉ុន្មានម៉ោងបន្ទាប់ពីប្រធានាធិបតីអ៊ីរ៉ង់ លោក Masoud Pezeshkian បាននិយាយទៅកាន់មហាសន្និបាតអង្គការសហប្រជាជាតិថាអ៊ីរ៉ង់នឹងមិនស្វែងរកការផលិតគ្រាប់បែកនុយក្លេអ៊ែរទេ បេសកជនប្រចាំតំបន់មជ្ឈិមបូព៌ារបស់លោកប្រធានាធិបតីសហរដ្ឋអាមេរិក Donald Trump លោក Steve Witkoff បាននិយាយថា «យើងគ្មានបំណងបង្កផលប៉ះពាល់ដល់ពួកគេទេ» ។ នៅមុនពេលសង្រ្គាមរយៈពេល១២ថ្ងៃរវាងអ៊ីរ៉ង់និងអ៊ីស្រាអែលកាលពីខែមិថុនា ទីក្រុងតេអេរ៉ង់និងទីក្រុងវ៉ាស៊ីនតោនបានបើកកិច្ចចរចានុយក្លេអ៊ែរចំនួន៥ជុំ ប៉ុន្តែបានប្រឈមនឹងឧបសគ្គសំខាន់ៗដូចជាការចម្រាញ់សារធាតុអ៊ុយរ៉ានីញ៉ូមនៅលើទឹកដីអ៊ីរ៉ង់ ដែលប្រទេសមហាអំណាចលោកខាងលិចចង់កាត់បន្ថយដល់កម្រិតសូន្យ ដើម្បីសម្រាលហានិភ័យនៃការផលិតអាវុធ។

អ្នកដឹងផ្ទៃក្នុងរបស់អ៊ីរ៉ង់ម្នាក់បាននិយាយថា «សារជាច្រើនត្រូវបានបញ្ជូនទៅកាន់ទីក្រុងវ៉ាស៊ីនតោនសម្រាប់ការបន្តកិច្ចចរចាតាមរយៈអ្នកសម្របសម្រួលកាលពីសប្តាហ៍កន្លងទៅ ប៉ុន្តែអាមេរិកពុំបានឆ្លើយតបនៅឡើយ»។ កាលពីថ្ងៃអង្គារសប្តាហ៍នេះ មេដឹកនាំកំពូលរបស់អ៊ីរ៉ង់ លោក Ayatollah Ali Khamenei ដែលបាននិយាយចុងក្រោយអំពីបញ្ហាសំខាន់ៗរបស់រដ្ឋ ដូចជាគោលនយោបាយការបរទេស និងកម្មវិធីនុយក្លេអ៊ែររបស់អ៊ីរ៉ង់ បានច្រានចោលការចរចាជាមួយសហរដ្ឋអាមេរិកក្រោមការគំរាមកំហែង។ សហរដ្ឋអាមេរិក សម្ព័ន្ធមិត្តអឺរ៉ុប និងអ៊ីស្រាអែល បានចោទប្រកាន់ទីក្រុងតេអេរ៉ង់ថា បានប្រើប្រាស់កម្មវិធីនុយក្លេអ៊ែររបស់ខ្លួនជារបាំងសម្រាប់កិច្ចខិតខំប្រឹងប្រែងដើម្បីព្យាយាមអភិវឌ្ឍសមត្ថភាពផលិតសព្វាវុធ។ អ៊ីរ៉ង់និយាយថា កម្មវិធីនុយក្លេអ៊ែររបស់ខ្លួនគឺសម្រាប់តែគោលបំណងសន្តិភាពប៉ុណ្ណោះ។