មន្ត្រីនគរបាល និងបុគ្គលិកសន្តិសុខ បានចេញល្បាតនៅតាមដងផ្លូវនានាក្នុងដែនដី Ladakh តំបន់ភ្នំហិម៉ាឡៃ របស់ប្រទេសឥណ្ឌានៅថ្ងៃព្រហស្បតិ៍ ទី២៥ ខែកញ្ញានេះ មួយថ្ងៃបន្ទាប់ពីការតវ៉ាដោយហិង្សាទាមទារភាពជារដ្ឋសម្រាប់ដែនដីសហព័ន្ធ និងកូតាការងារសម្រាប់អ្នកស្រុក ដែលការតវ៉ាបានបណ្តាលឲ្យមនុស្សយ៉ាងហោចណាស់បួននាក់ស្លាប់ និងរាប់សិបនាក់រងរបួស។

ផ្លូវនានាក្នុងទីក្រុង Leh មានភាពស្ងប់ស្ងាត់ដោយហាងជាច្រើនបានបិទទ្វារ ហើយរថយន្តរាប់សិបគ្រឿងមានបង្អួចបែក ខណៈបម្រាមគោចរត្រូវបានដាក់ចេញ។

កាលពីល្ងាចថ្ងៃពុធ ទី២៤ ខែកញ្ញា ក្រសួងមហាផ្ទៃរបស់ប្រទេសឥណ្ឌាបាននិយាយថា ការតវ៉ាបានបង្កឡើងដោយសុន្ទរកថា «បង្កហេតុ» ដោយសកម្មជន Sonam Wangchuk ដែលបានធ្វើកូដកម្មអត់អាហារចាប់តាំងពីថ្ងៃទី១០ ខែកញ្ញា។

តំបន់ពុទ្ធសាសនិក និងឥស្លាម បានបាត់បង់ស្វ័យភាពរបស់ខ្លួននៅឆ្នាំ២០១៩ នៅពេលដែលវាត្រូវបានកាត់ចេញពីរដ្ឋ Jammu និង Kashmir ដោយរដ្ឋាភិបាលរបស់នាយករដ្ឋមន្ត្រីឥណ្ឌា លោក Narendra Modi ហើយបានដាក់នៅក្រោមការគ្រប់គ្រងផ្ទាល់របស់ទីក្រុង New Delhi ។