ភ្នំពេញ ៖ ឯកឧត្តម ហាប់ ទូច រដ្ឋលេខាធិការប្រចាំការ តំណាងដ៏ខ្ពង់ខ្ពស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញចូលរួមក្នុងវេទិកាផ្លាស់ប្ដូរកិច្ចសហការ និងអភិវឌ្ឍន៍ភាពយន្តអន្តរជាតិនៃគោលនយោបាយយុទ្ធសាស្រ្តខ្សែក្រវាត់ និងផ្លូវ (Belt and Road Film Industry Collaboration) នៃមហោស្រពភាពយន្តអន្តរជាតិវិថីសូត្រលើកទី១២។

​ព្រឹតិ្តការណ៍ខាងលើបានធ្វើឡើងនៅទីក្រុងហ្វូចូវ ខេត្តហ្វូចៀន សាធារណរដ្ឋប្រជាមានិតចិន ឯកឧត្តម ហាប់ ទូច រដ្ឋលេខាធិការប្រចាំការ តំណាងដ៏ខ្ពង់ខ្ពស់លោកជំទាវបណ្ឌិតសភាចារ្យរដ្ឋមន្ត្រី បានអញ្ជើញចូលរួមវេទិកាផ្លាស់ប្ដូរកិច្ចសហការនិងអភិវឌ្ឍន៍ភាពយន្តអន្តរជាតិនៃគោលនយោបាយយុទ្ធសាស្រ្តខ្សែក្រវាត់ និងផ្លូវ (Belt and Road Film Industry Collaboration) នៃមហោស្រពភាពយន្តអន្តរជាតិវិថីសូត្រលើកទី១២។ ក្នុងវេទិកានេះ មានការចូលរួមពីសំណាក់លោកជំទាវអភិបាលរងនៃខេត្តហ្វូចៀន ថ្នាក់ដឹកនាំ ផលិតករ អ្នកដឹកនាំរឿងមកពីបណ្តាប្រទេសជាច្រើន សរុបប្រមាណ១៥០រូប, កាលពីរសៀលថ្ងៃទី២៣ ខែកញ្ញា ឆ្នាំ២០២៥។

លោក ប៉ុក បុរក្ស ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ បានអញ្ជើញចូលរួមក្នុងវេទិកានេះ ប្រាប់BTV ព័ត៌មាន នាព្រឹកថ្ងៃទី២៥ ខែកញ្ញានេះថា វេទិកាផ្លាស់ប្ដូរកិច្ចសហការ និងអភិវឌ្ឍន៍ភាពយន្តអន្តរជាតិនៃគោលនយោបាយយុទ្ធសាស្រ្តខ្សែក្រវាត់ និងផ្លូវ (Belt and Road Film Industry Collaboration) ត្រូវបានរៀបចំឡើងក្នុងគោលបំណងលើកកម្ពស់កិច្ចសហប្រតិបត្តិការ និងផ្លាស់ប្តូរបទពិសោធន៍ គោលនយោបាយ និងបង្ហាញពីសក្តានុពលនៃប្រទេសនីមួយៗ ដើម្បីឈានទៅរកកិច្ចសហការនាពេលអនាគត។ ក្នុងវេទិកានេះ ក៏មានបទបង្ហាញ ស្តីពីគោលនយោបាយ និងសក្ដានុពលនៃធនធាននៃប្រទេសដែលជាដៃគូផងដែរ។ ក្នុងចំណោមវាគ្មិនទាំង១០រូប លោក ប៉ុក បូរក្ស ប្រធាននាយកដ្ឋានសិល្បៈភាពយន្តនិងផ្សព្វផ្សាយវប្បធម៌ ក៏បានធ្វើបទបង្ហាញពីគោលនយោបាយរបស់រដ្ឋាភិបាលក្នុងទាក់ទាញផលិតករបរទេស មកថតភាពយន្តនៅកម្ពុជា និងស្វាគមន៍នូវកិច្ចសហការផលិតភាពយន្តជាមួយបណ្តាប្រទេសនានា ជាពិសេសផលិតករមកពីសាធារណរដ្ឋប្រជាមានិតចិន ក្រោមអនុស្សរណៈយោគយល់គ្នាស្តីពីកិច្ចប្រតិបត្តិការស្តីការវិស័យភាពយន្តដែលទើបសម្រេចបានកាលពីខែមេសា ឆ្នាំ២០២៥ថ្មីៗនេះ។

នៅចុងបញ្ចប់ នៃវេទិកានេះ ក៏មានការចុះហត្ថលេខារវាងបណ្តាប្រទេសដែលបានចូលរួមទាំងអស់ ស្តីពីការបង្ហាញឆន្ទៈក្នុងកិច្ចសហការក្នុងវិស័យភាពយន្តនាពេលអនាគតផងដែរ។

សូមរំលេចឡើងវិញថា កាលពីព្រឹកថ្ងៃទី២២ ខែកញ្ញា ឆ្នាំ២០២៥ ឯកឧត្តម ហាប់ ទូច រដ្ឋលេខាធិការប្រចាំការ បានអញ្ជើញជាអធិបតីក្នុងកម្មវិធីសម្ពោធការិយាល័យថ្មីរបស់គណៈកម្មការរៀបចំមហោស្រពភាពយន្តកម្ពុជាអាស៊ី(CAFF) នៅទីក្រុងហ្វូចូវ សាធារណរដ្ឋប្រជាមានិតចិន និងដោយមានវត្តមានដ៏ខ្ពងខ្ពស់របស់ព្រះនាង ជេនណា នរោត្តម និងការចូលរួមពីលោក Zhang Yan សមាជិកនៃគណៈកម្មាធិការបក្សខេត្តហ្វូចៀននិងជាប្រធានគណៈកម្មការនៃនាយកដ្ឋានឃោសនាការខេត្តហ្វូចៀន លោក Huang Jianxiong សមាជិកនៃគណៈកម្មាធិកាបក្សទីក្រុងហ្វូចូវ និងជាប្រធានគណៈកម្មការនៃនាយកដ្ឋានឃោសនាការទីក្រុងហ្វូចូវ លោក Wang Jiannan អនុប្រធាននាយកដ្ឋានឃោសនាការនៃគណៈកម្មាធិការបក្សខេត្តហ្វូចៀននិងជាប្រធានការិយាល័យភាពយន្តប្រចាំខេត្តហ្វូចៀន លោកស្រី Hong Li នាយិកាគណៈកម្មការរៀបចំមហោស្រពភាពយន្តកម្ពុជាអាស៊ីផងដែរ។

 តមកនៅរសៀលថ្ងៃដដែល ឯកឧត្តម ហាប់ ទូច រដ្ឋលេខាធិការប្រចាំការ បានអញ្ជើញចូលរួមកិច្ចប្រជុំជាមួយលោក Qin Zhengui អនុប្រធាននៃរដ្ឋបាលភាពយន្តចិន ដើម្បីពង្រឹងការងារដែលត្រូវអនុវត្តបន្តក្រោមអនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការលើវិស័យភាពយន្ត។

  នាឱកាសនេះឯកឧត្តមរដ្ឋលេខាធិការ បានបង្ហាញអំពីស្ថានភាពវិស័យភាពយន្តកម្ពុជា ព្រមទាំងស្នើទៅរដ្ឋបាលភាពយន្តចិន ជួយផ្តល់អាហារូបករណ៍ជូនដល់យុវជនកម្ពុជា ឱ្យបានសិក្សាជំនាញភាពយន្តនៅប្រទេសចិនផងដែរ។ បន្ថែមពីនេះ លោកក៏បានស្នើឱ្យពិចារណាក្នុងការសម្របសម្រួលឱ្យផលិតកម្មធំៗរបស់ចិនមកថតនៅកម្ពុជាផងដែរ៕

អត្ថបទ រដ្ឋា