ក្នុងសុន្ទរកថានៅអង្គការសហប្រជាជាតិ កាលពីថ្ងៃព្រហស្បតិ៍ (២៥ កញ្ញា) ប្រមុខការទូតរបស់រុស្ស៊ី បានចោទប្រកាន់ខ្លាំងៗដាក់សម្ព័ន្ធយោធាណាតូ និងសហភាពអឺរ៉ុប ថាបានប្រើប្រាស់អ៊ុយក្រែន ដើម្បីប្រកាស "សង្រ្គាមពិតប្រាកដ" ប្រឆាំងនឹងរុស្ស៊ី ជាអ្វីដែលចក្រភពអង់គ្លេស ច្រានចោលថាជា "រឿងបំភ្លៃបែបស្រមើស្រមៃ និងមិនពិតទាល់តែសោះប្រាប់ពិភពលោក"។

រដ្ឋមន្ត្រីការបរទេសរុស្ស៊ី លោក Sergei Lavrov បានលើកឡើងបែបនេះក្នុងកិច្ចប្រជុំ G20 នៃរដ្ឋមន្ត្រីការបរទេស នៅអង្គការសហប្រជាជាតិ រយៈពេលពីរថ្ងៃប៉ុណ្ណោះបន្ទាប់ពីប្រធានាធិបតីអាមេរិក លោក Donald Trump បានបង្ហាញពីជំហរកាន់តែតឹងរ៉ឹងលើទីក្រុងមូស្គូ ដោយលើកសរសើរកិច្ចខិតខំប្រឹងប្រែងធ្វើសង្គ្រាមរបស់អ៊ុយក្រែន និងបាននិយាយថា សម្ព័ន្ធយោធាណាតូ គួរតែបាញ់ទម្លាក់យន្តហោះរុស្ស៊ី ដែលចូលដែនអាកាសពួកគេ។

ភាពតានតឹងបានកើតមានឡើងតាមបណ្តោយស្លាបខាងកើតរបស់អឺរ៉ុប ដោយអេស្តូនី ចោទទីក្រុងមូស្គូថាបានបញ្ជូនយន្តហោះចម្បាំង ៣គ្រឿងចូលក្នុងដែនអាកាសរបស់ខ្លួន រយៈពេល ១សប្តាហ៍បន្ទាប់ពីយន្តហោះរបស់ណាតូ បាញ់ទម្លាក់ដ្រូនរុស្ស៊ី ក្នុងដែនអាកាសប៉ូឡូញ។

លោក Lavrov បាននិយាយថា "ឧទាហរណ៍ច្បាស់ៗមួយទៀតនោះគឺវិបត្តិនៅអ៊ុយក្រែន ដែលបង្កឡើងដោយលោកខាងលិច ដែលតាមរយៈនោះ ណាតូ និងប្លុកអឺរ៉ុប បានប្រកាសសង្រ្គាមពិតប្រាកដមួយដាក់លើរុស្ស៊ី ហើយមានការចូលរួមដោយផ្ទាល់នៅក្នុងជម្លោះ"។ ប្រមុខការទូតរុស្ស៊ីរូបនេះមិនបាននិយាយសំដៅលើការអត្ថាធិប្បាយរបស់លោក Trump នៅដើមសប្តាហ៍នេះទេ ប៉ុន្តែជំនួសមកវិញ បានបញ្ជាក់ជំហររបស់រុស្ស៊ីថា សង្គ្រាមនៅអ៊ុយក្រែន បង្កឡើងដោយសារតែសកម្មភាពរបស់លោកខាងលិច៕